धोनीपेक्षा त्याचा शिष्य ठरला सरस, जडेजाने आता माहीला या खास विक्रमात मागे टाकले....

दिगंबर शिंगोटे : दिग्गज क्रिकेटपटू महेंद्रसिंह धोनी याने आपल्या कारकिर्दीत अनेक विक्रम केले आहेत. आयपीएलमध्ये धोनीच्या नेतृत्वाखाली चेन्नई सुपर किंग्ज संघाने इतिहास घडवला. चेन्नई सुपर किंग्जने पाच वेळा जेतेपद पटकावले. मात्र, एका बाबतीत संघातील सहकारी रवींद्र जडेजाने धोनीला मागे टाकले आहे.

धरमशालामधील हिमाचल प्रदेश क्रिकेट संघटना स्टेडियममध्ये रविवारी चेन्नई सुपर किंग्ज आणि पंजाब किंग्ज या संघांत लढत झाली. चेन्नईविरुद्धच्या गेल्या पाच लढतींत पंजाब किंग्ज संघाने बाजी मारली होती. या वेळी मात्र चेन्नईने पंजाब किंग्ज संघाला २८ धावांनी धूळ चारली. चेन्नईने प्रथम फलंदाजी करताना १६७ धावा केल्या होत्या. प्रत्युत्तर देताना पंजाबला निर्धारित २० षटकांत ९ बाद १३९ धावाच करता आल्या. या यशात रवींद्र जडेजाने सिंहाचा वाटा उचलला. त्याने २६ चेंडूंत तीन चौकार आणि दोन षटकारांसह ४३ धावांची खेळी केली. त्यामुळे चेन्नईला दीडशेच्या पार मजल मारता आली. फलंदाजीत चमक दाखवल्यानंतर जडेजाने गोलंदाजीतही चमक दाखवली. त्याने प्रभसिमरनसिंग, कर्णधार सॅम करन आणि आशुतोष शर्मा या तिघांना बाद केले.

या अष्टपैलू कामगिरीमुळे जडेजाला सामनावीर म्हणून गौरवण्यात आले. यासह जडेजाने धोनीला मागे टाकले. जडेजा चेन्नई सुपर किंग्जकडून खेळताना सर्वाधिक सामनावीराचा किताब मिळवणारा खेळाडू ठरला. जडेजाने सोळाव्यांदा हा मान मि‌ळवला. चेन्नई सुपर किंग्जकडून खेळताना महेंद्रसिंह धोनीने आतापर्यंत पंधरा वेळा हा मान मिळवला आहे. त्यापाठोपाठ सुरेश रैना (१२), ऋतुराज गायकवाड (११) आणि मायकेल हसी (१०) हे खेळाडू आहेत.

आयपीएलमध्ये सर्वाधिक सामनावीराचा मान हा एबी डिव्हिलियर्सने मिळवला आहे. त्याने २५ वेळा हा मान मिळवला आहे. त्यापाठोपाठ ख्रिस गेलने २२ वेळा, रोहित शर्माने १९वेळा, डेव्हिड वॉर्नरने अठरा वेळा सामनावीराचा किताब मिळवला आहे.

जडेजा हा सध्या भन्नाट फॉर्मात आहे. फलंदाजी आणि गोलंदाजीतही त्याची चमक पाहायला मिळत आहे. चेन्नईच्या संघाबरोबर भारताच्या टी-२० संघासाठी ही आनंदाची बातमी आहे. कारण जडेजाने हा फॉर्म कायम ठेवला तर त्याचा फायदा भारताच्या टी-२ संघाला वर्ल्ड कपमध्ये होऊ शकतो.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-05-07T17:10:54Z dg43tfdfdgfd