धोनीला थाला बनवल्यावर रवींद्र जडेजाला आता CSK ने दिले खास नाव, पाहा काय आहे अर्थ...

चेन्नई : महेंद्रसिंग धोनीला चेन्नई सुपर किंग्स या संघाने थाला ही उपाधी दिली होती. त्यानंतर आता चेन्नईच्या संघाने रवींद्र जडेजाला एक खास नाव दिले आहे. जडेजाला हे खास नाव दिल्यावर सर्व जणं त्याचा अर्थ शोधत होते. पण सुरुवातीला या शब्दाचा अर्थ समजत नव्हता, पण आता या शब्दाचा अर्थ नेमका आहे तरी काय, हे समोर आले आहे.

रवींद्र जडेजाला चेन्नईच्या संघाने कर्णधारपद दिले होते. धोनीकडून कर्णधारपद काढून जडेजाला दिल्यामुळे चेन्नईच्या संघाची कामगिरी कशी होते, याकडे सर्वांचे लक्ष लागलेले होते. पण त्यावर्षी चेन्नईची कामगिरी ढासळली होती. एकामागून एक चेन्नईच्या संघाला अपयश येत होते. दुसरीकडे जडेजाची कामगिरीही खालावत चालली होती. कर्णधारपदाचे दडपण आल्यामुळे जडेजाची कामगिरी चांगली होत नसल्याचे म्हटले जात होते. त्यामुळे हा मोसम सुरु असतानाच जडेजाकडून चेन्नईच्या संघाने कर्णधारपद काढून घेतले होते आणि पुन्हा धोनीला कर्णधारपद दिले होते. त्यानंतर जडेजाने चेन्नईच्या संघाला सोशल मीडियावर अनफॉलो केले होते. त्यामुळे आता जडेजा चेन्नईचा संघ सोडणार, असे सर्वांना वाटत होते. पण तसे घडले मात्र नाही. या वर्षी आता चेन्नईने ऋतुराज गायकवाडला संघाचे कर्णधार बनवले आहे, पण जडेजाला एक मोठी उपाधी त्यांनी दिली आहे.

चेन्नईच्या संघाने एक ट्विट केले आहे. यामध्ये चेन्नईच्या संघाने जडेजाचे तीन फोटो लावले आहेत. यामध्ये एक फलंदाजी करताना, दुसरा गोलंदाजी करताना आणि तिसरा क्षेत्ररक्षणाचा फोटो लावला आहे. या फोटोमध्ये जडेजाने किती धावा केल्या, किती विकेट्स मिळवल्या आणि किती झेल टिपले, हेदेखील दाखवले आहे. या फोटवर चेन्नईच्या संघाने फोटोओळ लिहिली आहे. त्यामध्ये चेन्नईने THALAPATHY of all Trades असे जडेजाला म्हटले आहे. यामध्ये थालापथी या शब्दाचा अर्थ आहे तरी काय, हे आता समोर आले आहे.

चेन्नईच्या संघाने जडेजाबात जे थालापथी म्हटले आहे, त्याचा अर्थ सेनापती असा आहे. जडेजा हा एक दमदार अष्टपैलू खेळाडू आहे आणि संघासाठी तो एक सेनापती आहे, असे चेन्नईच्या संघाला यामधून सांगायचे आहे.

धोनीला चेन्नईमध्ये थाला या नावानेच ओळखले जाते, त्यामुळे आता जडेजाची ओळख थालापथी अशीच होणार का, हे पाहणे उत्सुकतेचे असेल. कारण चेन्नईचे चाहते क्रिकेटसाठी आणि खासकरून आपल्या संघातील खेळाडूंसाठी वेडे आहेत. त्यामुळे आता पुढच्या सामन्यात काय होणार, याची उत्सुकता सर्वांना असेल.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-10T13:58:52Z dg43tfdfdgfd