पंजाबने पहिल्याच चेंडूवर मॅच जिंकली असती पण शिखर धवनकडून कोणती मोठी चूक घडली पाहा...

नवी दिल्ली : पंजाब किंग्सच्या संघाला फक्त दोन धावांनी सनरायझर्स हैदराबादच्या संघाकडून पराभव पत्करावा लागला. पण यावेळी पंजाबचा कर्णधार शिखर धवनकडून एक मोठी चूक घडली. कारण या सामन्याच्या पहिल्याच चेंडूवर जी धवनकडून चूक घडली त्याचा मोठा फटका संघाला बसल्याचे पाहायला मिळाले.

पंजाब किंग्जने नाणेफेक जिंकून प्रथम क्षेत्ररक्षणाचा निर्णय घेतला होता. त्यावेळी पंजाबचा कागिसो रबाडा हा गोलंदाजी करण्यासाठी सज्ज झाला होता. त्याचा सामना करण्यासाठी हैदराबादच्या ट्रेव्हिस हेडने स्ट्राइक घेतला होता. रबाडाने पहिलाच चेंडू एवढा भन्नाट टाकला की, हेडला नेमकं काय करावं ते कळलंच नाही. त्यामुळे चेंडू हा यष्टीरक्षकाकडे गेला. त्यावेळी हेडच्या बॅटची कडा लागल्याचे रबाडाला वाटले. पंचांनी यावेळी अपील केल्यावर बाद दिले नाही. त्यामुळे सर्वांच्या नजरा शिखर धवनकडे वळल्या होत्या. पण धवनने यावेळी रीव्ह्यू घेण्यास नकार दिला. पण हीच धवनची मोठी चूक होती. कारण जेव्हा या चेंडूचा रिप्ले पाहिला गेला तेव्हा हेडच्या बॅटची कट लागली होती. त्यामुळे जर धवनने अपील केली असती तर हेड बाद झाला असता. हेडने यावेळी २१ धावा केल्या, पण हेड जर शून्यावर बाद झाला असता तर पंजाबला आव्हानही कमी मिळाले असते आणि ते हा सामना जिंकू शकले असते. पण धवनकडून घडलेली चूक संघाला महागात पडली आहे.

तत्पूर्वी, अर्शदीपसिंगच्या अचूक माऱ्यामुळे सुरुवातीला पॉवर-प्लेमध्ये अर्थात पहिल्या सहा षटकांत हैदराबादची ३ बाद ४० अशी अवस्था झाली होती. मात्र, नितीशकुमार रेड्डीने हैदराबादचा डाव सावरला. नितीश आणि राहुल त्रिपाठी यांनी हैदराबादला अर्धशतकी टप्पा पार करून दिला. मात्र, दहाव्या षटकात पटेलने राहुलला (११ धावा) बाद केले. त्यानंतर नितीशने हेनरिक क्लासेनच्या साथीने हैदराबादला शतकी टप्पा गाठून दिला. पटेलने क्लासेनला बाद करून ही जोडी फोडली. त्यानंतर नितीशला समदने मोलाची साथ दिली. त्यांनी सहाव्या विकेटसाठी २० चेंडूंत ५० धावांची भागीदारी रचली.

सतराव्या षटकात अर्शदीपने षटकात समद आणि नितीशला बाद केले. नितीशने ३७ चेंडूंत चार चौकार आणि पाच षटकारांसह ६४ धावांची, तर अब्दुल समदने १२ चेंडूंत पाच चौकारांसह २५ धावांची खेळी केली. पॅट कमिन्स (३) आणि भुवनेश्वर (६) झटपट परतले. मात्र, शाहबाज अहमद आणि जयदेव उनाडकटच्या फटकेबाजीमुळे हैदराबादने निर्धारित २० षटकांत ९ बाद १८२ धावांपर्यंत मजल मारली. शाहबाज अहमदने ७ चेंडूंत एक चौकार आणि एका षटकारासह नाबाद १४ धावा, तर उनाडकटने एका चेंडूंत एका षटकारासह सहा धावा केल्या.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-10T08:58:15Z dg43tfdfdgfd