पहिल्याच दिवशी इंग्लंडवर ऑल आऊटची नामुष्की, कुलदीप यादव आणि अश्विनने पाहुण्यांना गुंडाळले

धरमशाला : इंग्लंडच्या संघावार पाचव्या कसोटीच्या पहिल्याच दिवशी ऑल आऊट होण्याची नामुष्की ओढवली. कुलदीप यादवने यावेळी इंग्लंडचा अर्धा संघ गारद केला आणि त्यांचे कंबरडे मोडले. इंग्लंडच्या डावाला यावेळी कुलदीीपने खिंडार पाडले आणि त्याला अन्य गोलंदाजांची चांगली साथ मिळाल्यामुळे भारताला पहिल्याच दिवशी वर्चस्व गाजवता आले. कुलदीपच्या अचूक गोलंदाजीच्या जोरावर भारताला इंग्लंडला सामन्याच्या पहिल्याच दिवशी २१८ धावांवर ऑल आऊट करता आले. कुलदीपने यावेळी पाच तर अश्विनने यावेळी चार विकेट्स मिळवले.

इंग्लंडने टॉस जिंकला आणि प्रथम फलंदाजी करण्याचा निर्णय त्यांनी घेतला. इंग्लंडने यावेळी ६४ धावांची दमदार सलामी दिली. कुलदीप यादव यावेळी भारतीय संघाच्या मदतीला धावून आला. कुलदीप फक्त एवढ्यावर थांबला नाही, तर त्याने त्यानंतर ऑली पोपचाही काटा काढला. ध्रुव जुरेलने यावेळी कुलदीपला महेंद्रसिंग धोनीसारख्या टिप्स दिल्या होत्या, या गोष्टीचा कुलदीपने चांगलाच फायदा उचलला. कुलदीपने यावेळी ऑलीला चांगलेच चकवले आणि जुरेलने त्याला यष्टीचीत करत भराताला दुसरी विकेट मिळवून दिली. पण खरी कमाल तर कुलदीपने त्यानंतर केली.

यावेळी इंग्लंडचा सलामीवीर झॅक क्राऊली हा दमदार फलंदाजी करत होता. झॅकने अर्धशतक झळकावले होते. त्यामुळे तो आता शतक झळकावेल, असे वाटत होते. पण त्यावेळी पुन्हा एकदा कुलदीप भारताच्या मदतीला धावून आला. कुलदीपने यावेळी १०.९ डीग्री चेंडू वळवला आणि झॅकला क्लीन बोल्ड केल्याचे पाहायला मिळाले. भारताने बेन स्टो्कसला बाद केले आणि इंग्लंडच्या सहा विकेट्स मिळवल्या होत्या, त्यामध्ये पाच बळी हे कुलदीपचे होते. पण त्यानंतर कुलदीपच्या मदतीला धावून आला तो अश्विन.

अश्विनचा हा १०० वा कसोटी सामना होता. त्यामुळे तो कशी कामगिरी करतो, याकडे सर्वांचे लक्ष लागलेले होते. कुलदीपने पाच बळी मिळवले होते. पण त्यानंतर मैदानात अश्विनची जादू चालली. अश्विनने त्यानंतर इंग्लंडच्या चार फलंदाजांना बाद केले. कुलदीपने यावेळी ७२ धावांत पाच बळी मिळवले, तर अश्विनने ५१ धावांत चार फलंदाजांना बाद केले.

2024-03-07T09:26:08Z dg43tfdfdgfd