बटलरच ठरला बाजीगर, राजस्थानचा केकेआरवर अखेरच्या चेंडूवर थरारक विजय

कोलकाता : सुनील नरिनच्या शतकाच्या जोरावर केकेआरने प्रथम फलंदाजी करताना २२३ धावा केल्या होत्या. पण राजस्थानचा जोस बटलर हा एकटाच केकेआरवर भारी ठरल्याचे पाहायला मिळाले. जोसने अखेरच्या षटकात आपले शतक साजरे केले आणि संघाला दोन विकेट्स राखून दमदार विजय मिळवून दिला. बटलरने यावेळी ६० चेंडूंत नाबाद १०७ धावांची खेळी साकारली.

केकेआरच्या २२४ धावांचा पाठलाग करताना राजस्थानला सुरुवातीला दोन धक्के बसले. यशस्वी जैस्वाल (१९) आणि संजू सॅमसन (१२) हे लवकर बाद झाले. पण त्यानंतर रायन पराग आणि जोस बटलर यांनी दमदार फटकेबाजी करत तिसऱ्या विकेटसाठी ५० धावांची भागदारी रचली. ही जोडी आता मोठी धावसंख्या उभारणार, असे वाटत असतानाच रायन पराग बाद झाला आणि ही जोडी फुटली. परागने यावेळी १४ चेंडूंत चार चौकार आणि दोन षटकारांच्या जोरावर ३४ धावा केल्या. त्यानंतर फलंदाजीला आलेल्या ध्रुव ज्युरेल, आर. अश्विन आणि शिमऱन हेटमायर या तीन फलंदाजांना मिळून फक्त १० धावा करता आल्या आणि तिथेच हा सामना केकेआरच्या बाजूने झुकायला सुरुवात झाली. जोस बटलर हा त्यावेळी मैदानात होता आणि त्यानंतर त्याने फटकेबाजी सुरु करत आपले अर्धशतक झळकावले. जोस यावेळी संघाला विजयासमीप घेऊन चालला होता.

सुनील नरिनच्या शतकाने यावेळी केकेआरला दोनशे धावांचा टप्पा ओलांडून देण्यात मोलाचा वाटा उचलला. केकेआरचे बाकीचे खेळाडू मोठी फटकेबाजी करण्यात अपयश ठरत असताना नरिन हा एकटाच राजस्थानच्या गोलंदाजांचा समाचार घेत होता. सुरुवाती नरिन हा जास्त आक्रमक वाटत नसला तरी पॉवर प्लेनंतर नरिनने आपल्या फटक्यांची पेटी उघडली आणि संपूर्ण मैदानात फटकेबाजी केली. नरिनने यावेळी आयपीएलमधील आपले पहिले शतकही पूर्ण केले. या शतकासह नरिनने रोहित शर्मा आणि ट्रेव्हिस हेड या दोन्ही शतकवीरांचे विक्रम मोडले. नरिनने यावेळी ५६ चेंडूंत १३ चौकार आणि सहा षटकारांच्या जोरावर १०९ धावांची खेळी साकारली. नरिनच्या या शतकाच्या जोरावरच केकेआरच्या संघाला २० षटकांत ६ बाद २२३ अशी मोठी धावसंख्या उभारता आली.

राजस्थानकडून यावेळी युजवेंद्र चहलने सर्वाधिक ५४ धावा दिल्या. राजस्थानकडून अवेश खान आणि कुलदीन सेन यांनी प्रत्येकी दोन बळी मिळवले.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-16T18:38:09Z dg43tfdfdgfd