ब्रायन लाराने दिला सर्वांनाच धक्का, भारतीय T20 WORLD CUP संघात दोन खेळाडूंची अनपेक्षित निवड

नवी दिल्ली : भारताच्या टी-२० संघात कोणाला संधी मिळणार, याची जोरदार चर्चा सुरु झाली आहे. बरेच माजी क्रिकेटपटू आपला टी-२० वर्ल्ड कपचा संघ जाहीर करत आहेत. वेस्ट इंडिजचा महान क्रिकेटपटू ब्रायन लाराने यावेळी टी-२० वर्ल्ड कपसाठी भारताचा संघ जाहीर केला आहे. पण हा संघ जाहीर करताना त्याने सर्वांनाच धक्का दिला आहे. कारण या संघात लाराने दोन अशा खेळाडूंची नावं घेतली आहेत, ज्यांची चर्चा कुठेही होताना दिसत नाही.

लाराने रोहित शर्माकडेच भारताचे कर्णधारपद दिले आहे. या संघात रोहितबरोबर यशस्वी जैस्वाल हा सलामीवीर आहे. त्यानंतर विराट कोहली, संजू सॅमसन, ऋषभ पंत यांचीही निवड त्याने केली आहे. लाराने या संघात हार्दिक पंड्या आणि शिवम दुबे या दोघांनाही स्थान दिले आहे. त्याचबरोबर फिरकीची जबाबदारी रवींद्र जडेजा, कुलदीप यादव आणि युजवेंद्र चहल यांच्याकडे सोपवली आहे.

वेगवान गोलंदाजांमध्ये लाराने जसप्रीत बुमराहला कायम ठेवले आहे, तर अर्शदीप सिंग त्याला साथ देईल, असे म्हटले आहे. पण त्याबरोबर दोन खेळाडू लाराने असे निवडले आहेत की, ज्यांचं नावही कोणी घेतला दिसत नाही. यामध्ये पहिला खेळाडू आहे वेगवान गोलंदाज संदीप शर्मा. राजस्थान रॉयल्सकडून खेळताना संदीपने सातत्याने चांगली कामगिरी केली आहे. त्याचबरोबर मयांक यादवलाही लाराने आपल्या संघात स्थान दिले आहे. मयांकने यंदाच्या वर्षी आपली छाप पाडली आहे. आयपीएलमध्ये वेगवान मारा करत त्याने सर्वांना आपली दखल घ्यायला भाग पाडले आहे.

ब्रायन लाराने निवडलेला भारताचा टी-२० वर्ल्ड कपसाठी संघ : रोहित शर्मा (कर्णधार), यशस्वी जैस्वाल, विराट कोहली, सूर्यकुमार यादव, संजू सॅमसन, ऋषभ पंत, शिवम दुबे, हार्दिक पंड्या, रवींद्र जडेजा, कुलदीप यादव, युजवेंद्र चहल, जसप्रीत बुमराह, अर्शदीप सिंग, संदीप शर्मा आणि मयांक यादव.

लाराने यावेळी संघ निवडताना खेळाडू आणि त्यांचा फॉर्म पाहिला आहे. त्याचबरोबर या संघाची निवड करत असताना लाराने काही गोष्टी चांगल्या पद्धतीने मांडल्या आहेत. भारतीय संघात कोणत्या खेळाडूंची निवड निश्चित होणार आहे, हे लारालाही माहिती आहे. त्यानुसार लाराने आपला संघ तयार केला आहे. पण हा संघ तयार करत असताना त्याने दोन अशा खेळाडूंची नावं यामध्ये घेतली आहे, ज्याची चर्चा कोणीही सध्याच्या घडीला करताना दिसत नाही.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-29T15:09:55Z dg43tfdfdgfd