भारत अजूनही जेतेपदाच्या स्पर्धेत कायम - विश्वनाथन आनंद

टोरांटो : कँडिडेट्स बुद्धिबळ स्पर्धेत भारतीयांकडून फारशा आशा बाळगू नका, असे विश्वनाथन आनंदने स्पर्धेपूर्वी सांगितले होते. मात्र, विदीत गुजराती, डी. गुकेश आणि आर. प्रज्ञानंद यांनी पहिल्या चार फेऱ्यांमध्ये चांगली कामगिरी करून आशा निर्माण केल्या आहेत. अजूनही भारतीय अव्वल स्थानापासून दूर असले, तरी गुकेशची कामगिरी पाहता आगामी लढतीत परिस्थिती बदलण्याची जास्त आशा आहे.

गुकेशने प्रज्ञानंदला पराभूत करून आपली उच्च क्षमता अधोरेखित केली, तर विदीत गुजरातीने हिकारू नाकामुराची अपराजित मालिका खंडित केली. स्पर्धेतील १४पैकी चार फेऱ्या झाल्या आहेत. भारतीयांनी नक्कीच चांगली सुरुवात केली आहे. मात्र, जागतिक लढतीस पात्र ठरण्यासाठी अर्थात आव्हानवीर होण्यासाठीचा मार्ग जास्त खडतर आहे. चार फेऱ्यांमधून तीन गुण मिळवलेला इयान नेपोमिनिशी भारतीयांच्या मार्गातील मुख्य अडथळा आहे. त्याने विदीत आणि फिरौझा अलीरेझा यांना हरवले आहे. गुकेश आणि इयान नेपोमिनिशी यांच्यात केवळ अर्ध्या गुणाचा फरक आहे.

चौथ्या क्रमांकावर असलेल्या प्रज्ञानंदचा दीड गुण आहे. अजूनही त्याच्यावरच स्थानिक माध्यमांचे लक्ष्य आहे. चाहत्यांना त्याची भेट हवी आहे. प्रज्ञानंद, त्याची बहीण वैशाली या स्पर्धेस पात्र ठरले आहेत. त्या दोघांसह त्याची आई नागलक्ष्मीचीही छायाचित्रे सोशल मीडियावर दिसत आहेत. 'लढत खेळल्यानंतर रूममध्ये परत जातो, त्या वेळी तिथे कुणीतरी असणे खूपच महत्त्वाचे असते. पराभवानंतर याची गरज जास्त असते. आईची साथ आमच्या दोघांसाठी (प्रज्ञानंद आणि वैशाली) खूपच मोलाची आहे,' असे प्रज्ञानंदने सांगितले.

गुकेशचे चार फेऱ्यांनंतर २.५ गुण आहेत. ही नक्कीच चांगली कामगिरी आहे; पण त्याला सलग दोन फेऱ्यांमध्ये विजयाची संधी होती. हे दुर्लक्षित करता येणार नाही. अर्थात, त्याने कोणालाही अपेक्षा नसताना प्रज्ञानंदला पराभूत केले होते. गुकेशविरुद्धच्या पराभवानंतर प्रज्ञानंदने स्वतःला चांगले सावरले. त्याने बहरात असलेल्या विदीतला हरवले. विदीतने पहिल्या दोन फेऱ्यांत उंटाच्या आगळ्या चाली करून सर्वांचे लक्ष वेधले. त्यात त्याने प्रभावी कामगिरीही केली होती. मात्र, सलग दोन पराभवाने त्याला धक्का बसला. सोमवारच्या विश्रांतीमुळे त्याला सावरण्यास चांगली मदत मिळाली असेल.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-10T14:58:59Z dg43tfdfdgfd