भारताच्या टी-२० वर्ल्डकप संघात होणार सरप्राइज एन्ट्री; IPLमध्ये धमाका करणारे ५ खेळाडू स्पर्धेत

मुंबई: आयपीएलच्या १७व्या हंगामातील साखळी फेरीच्या निम्म्या लढती पूर्ण झाल्या आहेत. आतापर्यंत झालेल्या लढतीत अनेक भारतीय खेळाडूंनी दमदार कामगिरी केली आहे. आयपीएलचा हा हंगाम यासाठी देखील महत्त्वाचा आहे कारण त्यानंतर टी-२० वर्ल्डकप होणार आहे. यासाठी निवड समितीची नजर आयपीएलमधील कामगिरीवर असणार आहे. जून महिन्यात होणाऱ्या टी-२० वर्ल्डकपसाठी संघ निवडीची तयारी अंतिम टप्प्यात आहे.

गेल्या काही दिवसांपासून भारताच्या वर्ल्डकप संघात कोणाला संधी मिळेल याची चर्चा सुरू आहे. आता या यादीत काही खेळाडूंची सरप्राइज इंट्री होण्याची शक्यता व्यक्त केली जात आहे. भारतीय वर्ल्डकप संघात संधी मिळण्याची शक्यता असलेली पाच सरप्राइज नावे...

१) मोहसिन खान- आगामी टी-२० वर्ल्डकप संघात मोहसिन खान याला संधी मिळू शकते. लखनौ सुपर जायंट्स संघाकडून खेळणाऱ्या या जलद गोलंदाजाने ५ सामन्यात ७ विकेट घेतल्या आहेत. त्याची इकॉनमी १०च्या खाली आहे. त्याच बरोबर गोलंदाजीतील विविधतेमुळे तो फलंदाजांसाठी धोकादायक ठरला आहे.

२) यश ठाकूर- भारतीय संघात सरप्राइज इंट्री मिळण्याची शक्यता असलेला आणखी एक खेळाडू म्हणजे युवा जलद गोलंदाज यश ठाकूर होय. आयपीएलच्या १७व्या हंगामात ७ सामन्यात ९ विकेट घेतल्या आहेत. यात एकदा पाच विकेटचा समावेश आहे. यशने त्याच्या गोलंदाजीने सर्वांना प्रभावित केले आहे. त्यामुळे टी-२० वर्ल्डकपसाठी त्याच्या नावाची चर्चा नक्कीच होऊ शकते.

३) राजधानी एक्स्प्रेस मयांक यादव- आयपीएल २०२४ मध्ये वेगवान गोलंदाजीच्या जोरावर सर्वांना हैराण करणाऱ्या मयांक यादव भारतीय संघात सरप्राइज इंट्री करणाऱ्या खेळाडूंच्या यादीत अव्वल स्थानी आहे. दुखापतीमुळे त्याने ३ सामने खेळले असले तरी त्यात ६ विकेट घेतल्या आहेत. जर फिटनेसने साथ दिली तर मयांकला भारतीय संघात घेण्याचा विचार होऊ शकतो.

४) हर्षित राणाची दावेदारी- कोलकाता नाइट रायडर्सकडून खेळणारा हर्षितने देखील टी-२० वर्ल्डकप संघात मजबूत दावेदारी केली आहे. या हंगामात त्याने शानदार गोलंदाजी केली आहे. आयपीएलमधील ६ सामन्यात त्याच्या नावावर ९ विकेट असून इकॉनमी देखील १०च्या खाली आहे.

५) तुषार देशपांडे- टी-२० वर्ल्डकपमध्ये चेन्नई सुपर किंग्जचा जलद गोलंदाज तुषार देशपांडेचा समावेश झाला तर धक्का बसू नयेत. या हंगामात तुषारला फार विकेट मिळाल्या नसल्या तरी तो फायदेशी ठरला आहे. ८ सामन्यात त्याने ६ विकेट घेतल्या आहेत. कमी धावा दिल्यामुळे त्याचा भारतीय संघात विचार केला जाऊ शकतो.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-25T11:08:06Z dg43tfdfdgfd