महाराष्ट्राच्या शेतकऱ्यांची लेक किरण नवगिरे ठरली WPL ची स्टार आणि मुंबई इंडियन्सची कर्दनकाळ

मुंबई : किरण नवगिरे हे नाव सध्याच्या घडीला प्रकाशझोतात आले आहे. कारण किरण आता WPL ची स्टार ठरली आहे. दुसरीकडे ती मुंबई इंडियन्सच्या संघासाठी कर्दनकाळ ठरली आहे. महाराष्ट्रातील शेतकऱ्याच्या घरातील ही किरण आता WPL सारखे व्यासपीठ झळाळून टाकले आहे.

किरण ही मुळची सोलापूरची. किरणचे वडिल शेती करतात. किरणला अजून दोन भाऊ आहेत. लहानपणापासून तिला खेळांची आवड होती. १०० मी. धावण्याची शर्यत, भाला फेक आणि गोळा फेक या खेळांमध्ये किरण पुण्याकडून विद्यापीठ स्तरावर खेळली होती. सुरुवातीला क्रिकेट हा खेळ जास्त आवडत नव्हता, पण जेव्हा क्रिकेटकडे वळली त्यानंतर तिने मागे वळून पाहिले नाही. महाराष्ट्राकडून ती २०१८-१९ साली क्रिकेट खेळली. किरणची जगाला ओळख झाली ती महिलांच्या टी-२० लीगमध्ये. व्हेलिसिटी या संघाकडून खेळताना तिने २४ चेंडूंतच अर्धशतक झळकावले होते. महिला क्रिकेटमधील हे सर्वात जलद शतक ठरले. किरणने क्रिकेट खेळत असताना एक मोठा निर्णय घेतला आणि तो म्हणजे महाराष्ट्र सोडण्याचा.

किरणनने नागालँडकडून भारतातील स्थानिक क्रिकेट खेळायला सुरुवात केली. नागालँडकडून खेळताना तिने मोठा विक्रम आपल्या नावावर केला. नागालँडकडून खेळत असताना किरणने १६२ धावांची धडाकेबाज खेळी साकारली. आतापर्यंत महिलांच्या स्पर्धेत कोणालाही अशी कामगिरी करता आली नव्हती. त्यामुळे किरणचे नाव पुन्हा एकदा प्रकाशझोतात आले. लहानपणी गोळाफेक, भालाफेक आणि धावण्याच्या शर्यतीत भाग घेण्याचा फायदा किरणला चांगलाच होत असल्याचे दिसत आहे. एकामागूनएक यशाची शिखरे चढताना किरणला संधी मिळाली ती WPL खेळण्याची. उत्तर प्रदेशच्या संघाने किरणला संधी दिली आणि ती मुंबई इंडियन्सच्या पराभवाचे मुख्य कारण ठरली.

मुंबई इंडियन्सच्या संघाने १६२ धावांचे आव्हान उत्तर प्रदेशच्या संघापुढे ठेवले होते. यापूर्वी एकही सामना मुंबईच्या संघाने गमावलेला नव्हता. त्यामुळे त्यांचे पारडे जड समजले जात होते. पण किरणने यावेळी उत्तर प्रदेशच्या संघाला दणदणीत सुरुवात करून दिली. किरणने सुरुवातीपासूनच गोलंदाजांवर जोरदार हल्ला चढवला. किरणने यावेळी फक्त ३१ चेंंडूंत सहा चौकार आणि चार षटकारांच्या जोरावर ५७ धावांची धडाकेबाज खेळी साकारली आणि संघासाठी विजयाचा पाया रचला. किरणने धमाकेदार फटकेबाजी करत मुंबईची गोलंदाजी निष्प्रभ केल्याचे पाहायला मिळाले. त्यामुळेच या सामन्यात उत्तर प्रदेशच्या संघाला यश मिळवता आले.

किरणने तुफानी फटकेबाजी करत संघाला विजय मिळवून दिला. त्यामुळे आता तिच्याकडून चाहत्यांना अपेक्षा वाढलेल्या असतील.

2024-02-29T09:07:12Z dg43tfdfdgfd