मुंबई इंडियन्सचा घरच्या मैदानातच पराभव, केकेआरने साकारला दमदार विजय

मुंबई : हार्दिक पंड्याच्या नेतृत्वाखाली मुंबई इंडियन्सचे आव्हान अखेर IPL 2024 मधून जवळपास संपुष्टात आले. मुंबईच्या घरच्या मैदानातच केकेआरने त्यांचा पराभव केला आणि त्यांचे प्ले ऑफच्या शर्यतीमधून बाहेर काढले. वेंकटेश अय्यरच्या ७० धावांच्या खेळीच्या जोरावर केकेआरला १६९ धावांपर्यंत मजल मारता आली होती. हे आव्हान मोठे वाटत नसले तरी मुंबईच्या संघाची सुरुवातीपासून पडझड झाल्याचे पाहायला मिळाले. सूर्यकुमार यादवने अर्धशतक झळकावत मुंबईच्या संघाला सारवण्याचा जोरदार प्रयत्न केला. पण सूर्या बाद झाला आणि हा सामना मुंबईच्या हातून निसटला. केकेआरने २४ धावांनी मुंबईवर यावेळी विजय साकारला.

केकेआरच्या १७० धावांचा पाठलाग करताना मुंबईची सुरुवात चांगली झाली नाही. कारण दुसऱ्या षटकापासूनच यावेळी मुंबईच्या संघाला धक्के बसायला सुरुवात झाली. ईशान किशन हा १३ धावांवर बाद झाला आणि मुंबईला पहिला धक्का बसला. रोहित शर्माला यावेळी इम्पॅक्ट प्लेअर म्हणून खेळवले होते, पण त्याला ११ धावांवर समाधान मानावे लागले. कर्णधार हार्दिक पंड्याला भोपळा फोडण्यात यश आले आणि तो एकच धाव करून बाद झाला. त्यामुळे मुंबई इंडियन्सची ६ बाद ७१ अशी अवस्था झाली होती. पण तरीही मुंबईचा संघ हा सामना हरणार नाही, असे काही जणांना वाटत होते. कारण त्यावेळी सूर्यकुमार यादव खेळपट्टीवर उभा होता. सूर्याने यावेळी ३५ चेंडूंत ६ चौकार आणि दोन षटकारांच्या जोरावर ५६ धावांची खेळी साकारली.

मुंबईला यावेळी गोलंदाजीत चांगली सुरुवात करुन दिली ती नुवान थुसाराने. नुवानने पहिल्याच षटकाच्या चौथ्या चेंडूवर केकेआरचा सलामीवीर फिल सॉल्टला बाद केले, सॉल्टला यावेळी फक्त पाच धावा करता आल्या. त्यानंतरच्या आपल्या षटकात नुवानने अंगक्रिश रघुवंशीला १३ धावांवर बाद केले. नुवान फक्त एवढ्यावरच थांबला नाही, तर त्याने याच षटकात केकेआरचा कर्णधार श्रेयस अय्यरलाही सहा धावांवर बाद केले. त्यामुळेच मुंबईने केकेआरची अवस्था ३ बाद २८ अशी केली होती. पण त्यानंतर वेंकटेश अय्यर फलंदाजीला आला आणि त्याने संघाला सावरले. तो यावेळी संघासाठी तारणहार ठरला. वेंकटेशने ५२ चेंडूंत सहा चौकार आणि तीन षटकारांच्या जोरावर ७० धावांची खेळी साकारली. त्यामुळेच केकेआरच्या संघाला यावेळी १६९ धावा तरी करता आल्या.

केकेरची फलंदाजी एवढी तगडी आहे की, ते वानखेडेच्या पाटा खेळपट्टीवर सहजपणे २०० धावा गाठतील, असे वाटत होते. पण मुंबईच्या गोलंदाजांनी भेदक मारा केला आणि केकेआरच्या धावसंख्येला चांगला लगाम लावला.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-05-03T17:56:13Z dg43tfdfdgfd