मुंबई इंडियन्सच्या दोघा खेळाडूंवर BCCIची मोठी कारवाई; पंजाब किंग्जविरुद्धच्या सामन्यात पाहा काय गोंधळ घातला

नवी दिल्ली: आयपीएलमध्ये मुंबई इंडियन्सच्या कामगिरीवर सर्वांचे लक्ष असते. पाच विजेतपद मिळवणाऱ्या मुंबई संघाची या हंगामातील सुरुवातीची कामगिरी खराब झाल्यानंतर मुंबईने कमबॅक केले. गेल्या लढतीत मुंबईने पंजाब किंग्जविरुद्ध ९ धावांनी विजय मिळवला. मात्र या लढतीनंतर मुंबई संघातील दोन खेळाडूंवर मोठी कारवाई झाली.

पंजाब किंग्जविरुद्धच्या लढतीनंतर मुंबईचा स्टार फलंदाज टिम डेव्हिड आणि फलंदाजीचा प्रशिक्षक कायरन पोलार्ड यांच्यावर आयपीएलची आचारसंहिता भंग केल्याप्रकरणी बीसीसीआयने मोठी कारवाई केली. या दोघांना मॅच फ्रीच्या २० टक्के इतका दंड करण्यात आला आहे.

डेव्हिड आणि पोलार्ड यांनी आचारसंहिता अनुच्छेत २.२० मधील लेव्हल १ ची चूक केली आहे. यामुळे त्यांच्यावर प्रत्येकी २० टक्के इतका दंड करण्यात आला आहे. या प्रकरणी मॅच रेफरीचा निर्णय अंतिम मानला जातो. या दोन्ही खेळाडूंनी त्यांच्याकडून झालेली चूक मान्य केली. त्यानंतर त्यांना दंड करण्यात आला.

आयपीएलकडून प्रसिद्ध करण्यात आलेल्या माहितीनुसार, टिम डेव्हिड आणि कायरन पोलार्ड यांना त्यांनी केलेल्या चुकीची शिक्षा करण्यात आली. पंजाबविरुद्ध मॅच सुरू असताना पोलार्ड आणि डेव्हिड यांनी डगआउटमध्ये बसून सूर्यकुमार यादवला डीआरएस घेण्यास सांगितले. ज्यासाठी ही कारवाई करण्यात आली.

नेमक काय झाले

नियमानुसार डीआरएसचा वापर करताना खेळाडूंनी मैदानाबाहेर कोणाचीही मदत घ्यायची नसते. पंजाबविरुद्धच्या सामन्यात मुंबई इंडियन्स संघातील सदस्यांनी सूर्यकुमार यादवला अशा प्रकारची मदत केल्याचे आढळले. टीव्हीवर संघाचे कोच मार्क बाउचर हे सूर्याला इशारा देत असताना दिसले. सूर्यकुमार फलंदाजी करत असताना त्याने खेळलेला चेंडू वाइड देण्याची मागणी करण्यासाठी बाउचर त्याला डीआरएस घेण्यास सांगत होते. डेव्हिड आणि पोलार्ड यांनी अर्शदीप सिंगने टाकलेला चेंडूवर डीआरएस घेण्याची मागणी केली. ज्यावर पंजाबच्या कर्णधाराने देखील आक्षेप घेतला होता.

पंजाबविरुद्धच्या लढती प्रथम फलंदाजी करताना मुंबईने १९२ धावा केल्या होत्या. उत्तरादाखल पंजाबचा डाव १९.१ षटकात संपुष्टात आला. ही लढत मुंबईने ९ धावांनी जिंकली. मुंबईचे ७ सामन्यात ३ विजय आणि ४ पराभवासह ६ गुण असून ते गुणतक्त्यात सातव्या क्रमांकावर आहेत.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-20T12:42:18Z dg43tfdfdgfd