मुंबईकर शिवमने फोडला मुंबई इंडियन्सला घाम, तुफानी फटकेबाजीसह चेन्नईचा धावांचा डोंगर

मुंबई : वानखेडेवर मुंबईकर शिवम दुबेचे वादळ पाहायला मिळाले. शिवमने यावेळी धमाकेदार फटकेबाजी करत मुंबई इंडियन्सच्या संघाला चांगलाच धाम फोडला. शिवमला यावेळी चेन्नईचा कर्णधार ऋतुराजची चांगली साथ मिळाली. ऋुतराज गायकवाड आणि शिवम दुबे यांनी तुफानी फटकेबाजी करत मुंबई इंडियन्सच्या संघाला चांगलाच घाम फोडला. या दोघांच्या दमदार खेळींच्या जोरावर चेन्नईला या महत्वाच्या सामन्यात २०६ धावांचा डोंगर उभारता आला. शिवमने यावेळी ३८ चेंडूंत १० चौकार आणि तीन षटकारांच्या जोरावर नाबाद ६६ धावा केल्या. धोनीने यावेळी फक्त अखेरच्या चार चेंडूंत ३ षटकारांसह नाबाद २० धावा करत सामन्यात चांगलीच रंगत आणली. हार्दिकने अखेरच्या षटकात २० धावा चेन्नईला आंदण दिल्या.

चेन्नईला अजिंक्य रहाणेने चौकार लगावत चांगली सुरुवात करून दिली. पण तो पाच धावांवर बाद झाला. राचिन रवींद्रने आतापर्यंत संघाला चांगली सुरुवात करून दिली होती. पण यावेळी त्याला २१ धावांवरच समाधान मानावे लागले. पण त्यानंतर या सामन्यात ऋतुराज आणि शिवम यांनी दमदार फलंदाजी करत चेन्नईच्या संघाला फ्रंटफूटवर आणले. कारण ऋतुराज आणि शिवम यांनी यावेळी मुंबईच्या गोलंदाजीचा चांगलाच समाचार घेतला. या दोघांनी आपली अर्धशतके पूर्ण तर केलीच, पण त्याचबरोबर या दोघांनी संघाची धावगती चांगली वाढवली. हार्दिक पंड्या, आकाश मढवाल, रोमारिओ शेफर्ड यांच्या गोलंदाजीचा या दोघांनी चांगलाच प्रतिकार केला आणि धावांची लूट केली. या दोघांनी चौथ्या विकेटसाठी ९० धावांची भागीदारी रचली आणि संघाला १५० धावांचा टप्पा ओलांडता आला. त्यामुळे चेन्नईचा संघ यावेळी मोठ्या धावसंख्येच्या दिशेने कूच करू लागला.

ऋतुराजने यावेळी अर्धशतकासह आपल्या २ हजार धावाही पूर्ण केल्या. ऋतुराजपेक्षा यावेळी शिवम हा जास्त आक्रमक खेळत असल्याचे पाहायला मिळाले. कारण शिवमने यावेळी फक्त २८ चेंडूंत आपले अर्धशतक झळकावले. ऋतुराज यावेळी १६ व्या षटकात मोठा फटका मारण्याच्या नादात बाद झाला. ऋतुराजने यावेळी ४० चेंडूंत पाच चौकार आणि पाच षटकारांच्या जोरावर ६९ धावांची खेळी साकारली.

मुंबईने सुरुवातीची काही षटके चांगली गोलंदाजी केली होती. त्यामुळे त्यांनी सुरुवातीला दोन विकेट्स मिळवल्या. पण त्यानंतर मात्र मुंबईची गोलंदाजी बिघडल्याचे पाहायला मिळाले. कारण ऋतुराज आणि शिवम यांनी सेट झाल्यावर धमाकेदार फट़केबाजी केली. त्यामुळे मुंबई इंडियन्सचा ताबा खेळावरून सुटल्याचे पाहायला मिळाले.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-14T15:55:28Z dg43tfdfdgfd