मुंबईची टीम आली फॉर्मात, रोहितच्या तुफानी फलंदाजीनंतर उभारला धावांचा डोंगर

मुंबई : रोहित शर्माची तुफानी सुरुवात आणि टीम डेव्हिडने अखेरच्या षटकांत केलेली धमाकेदार फटकेबाजी, यामुळे मुंबई इंडियन्सला दिल्लीविरुद्धच्या सामन्यांत धावांचा डोंगर उभारता आला. रोहित शर्माने मुंबईला धडाकेबाज सुरुवात करून दिली. त्यानंतर ईशान किशन, हार्दिक पंड्या, रोमारिओ शेफर्ड आणि टीम डेव्हिड यांनीही तुफानी फटकेबाजी केली. त्यामुळेच मुंबई इंडियन्सच्या संघाला यावेळी मोठी धावसंख्या उभारता आली. रोहित शर्माचे अर्धशतक यावेळी फक्त एका धावेने हुकले. टीम डेव्हिडने यावेळी नाबाद ४५ धावा केल्या, तर रोमारिओ शेफर्डने अखेरच्या ओव्हरमध्ये ३२ धावा लुटल्या. त्यामुळे मुंबई इंडियन्सच्या संघाला पहिल्या डावात २३४ धावांचा डोंगर उभारता आला.

रोहित शर्माने यावेळी मुंबई इंडियन्सच्या संघाला झोकात सुरुवात करून दिली. रोहितने यावेळी इशांत शर्माच्या पहिल्याच षटकात दोन चौकार लगावले आणि आपले इरादे स्पष्ट केले. रोहित फक्त या दोन चौकारांवर थांबला नाही. कारण रोहितने त्यानंतरही धडाकेबाज फटकेबाजी सुरु ठेवली. रोहितला यावेळी ईशान किशनची चांगली साथ मिळाली. रोहित आणि ईशान यांनी यावेळी ८० धावांची दमदार सलामी दिली. रोहित शर्मा ४९ धावावंर खेळत होता, या आयपीएलमधील त्याचे पहिले अर्धशतक होऊ शकले असते. पण यावेळी दिल्लीच्या अक्षर पटेलने त्याला क्नील बोल्ड केले आणि मुंबईच्या संघाला मोठा धक्का बसला. रोहित बाद झाल्यावर फलंदाजीला आला तो सूर्यकुमार यादव. सूर्याचा हा पहिलाच सामना होता. त्यामुळे तो कशी कामगिरी याकडे सर्वांचे लक्ष होते. पण यावेळी शून्याला भोपळाही फोडता आला नाही.

सूर्या बाद झाला आणि त्यानंतर ईशानने काही काळ संघाची जबाबदारी सांभाळली. पण अक्षर पटेलला मोठा फटका मारण्याच्या नादात ईशानने आपली विेकेट गमावली. ईशान किशनने यावेळी २३ चेंडूंत ४ चौकार आणि दोन षटकारांच्या जोरावर ४२ धावांची खेळी साकारली. ईशान बाद झाल्यावर तिलक वर्माही फक्त सहा धावांत बाद झाला. पण त्यावेळी हार्दिक पंड्याने संघाचा डाव सावरला. हार्दिकने टीम डेव्हिडच्या साथीने यावेळी संघाचा सावरला. त्यामुळेच मुंबईच्या संघाला १५० धावांचा पल्ला ओलांडता आला.

दिल्लीच्या संघाकडून यावेळी अक्षर पटेलने चांगली कामगिरी केली. कारण अक्षरने यावेळी रोहित शर्माला बाद करत मुंबईच्या संघाला पहिला धक्का दिला. त्यानंतर दिल्लीच्या संघासाठी धोकादायक ठरणाऱ्या ईशान किशनाही बाद केले. अक्षरने मुंबई इंडियन्सच्या दोन्ही सलामीवीरांना बाद करत संघासाठी महत्वपूर्ण कामगिरी केली. अक्षरने चार षटकांत ३५ धावा देत या दोन खेळाडूंना तंबूचा रस्ता दाखवला.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-07T11:57:11Z dg43tfdfdgfd