यशस्वी जयस्वालने रचला इतिहास, आतापर्यंत कोणालाही अशी कामगिरी करता आली नाही...

दिगंबर शिंगोटे : यशस्वी जयस्वालने पाचव्या कसोटीत भारतीय संघाला दमदार सुरुवात करून दिली. या धडाकेबाज फटकेबाजीसह यशस्वीने आता इतिहास रचला आहे. भारताचा युवा फलंदाज यशस्वी जयस्वालने इंग्लंडविरुद्धच्या कसोटी क्रिकेट मालिकेत सातत्याने चांगली कामगिरी केली आहे. या मालिकेतील दमदार कामगिरीच्या जोरावर यशस्वीने आपल्या शिरपेचात आणखी एक तुरा खोवला आहे.

धरमशाला कसोटीत भारताने इंग्लंडचा पहिला डाव २१८ धावांत रोखला. त्यानंतर भारताला कर्णधार रोहित शर्मा आणि यशस्वी जयस्वाल यांनी धडाक्यात सुरुवात करुन दिली. त्यांनी १२४ चेंडूंत १०४ धावांची सलामी दिली. यात यशस्वीने ५८ चेंडूंत पाच चौकार आणि तीन षटकारांसह ५७ धावांचे योगदान दिले. या अर्धशतकासह यशस्वी कसोटी क्रिकेटमध्ये सर्वांत कमी सामन्यांत हजार धावांचा टप्पा पार करणारा भारतीय फलंदाज ठरला. याबाबतीत त्याने मुंबईकर विनोद कांबळीला मागे टाकले. विनोद कांबळीने बारा कसोटींत हजार धावांचा टप्पा पार केला होता. यशस्वीने हा टप्पा नवव्या कसोटीतच पार केला.

यशस्वीने आतापर्यंत नऊ कसोटींत सोळा डावांत ६८.५३च्या सरासरीने १०२८ धावा केल्या आहेत. यात तीन शतकांचा समावेश आहे. यशस्वीचा स्ट्राइक रेट ७०.०७ आहे. पदार्पणानंतर २१३ दिवसांतच त्याने हा टप्पा पार केला आहे. कसोटी कारकिर्दीत हजार धावांचा टप्पा पार करताना विनोद कांबळीने यशस्वीपेक्षा जास्त कसोटी सामने खेळले असले, तरीही यशस्वीपेक्षा कमी डावांत विनोद कांबळीने हजार धावांचा टप्पा पार केला होता. विनोदने बारा कसोटींतील चौदा डावांत हा टप्पा पार केला होता. विनोदने पदार्पणानंतर १ वर्ष आणि २९३ दिवसांत हा टप्पा पार केला होता. कसोटी क्रिकेटमध्ये वेगवान हजार धावांचा टप्पा पार करणाऱ्या भारतीय फलंदाजांत चेतेश्वर पुजारा तिसऱ्या क्रमांकावर आहे. पुजाराने अकराव्या कसोटीत आणि अठराव्या डावात ही कामगिरी केली होती.

कसोटी क्रिकेटमध्ये सर्वांत वेगवान हजार धावांचा टप्पा पार करण्याचा विक्रम इंग्लंडच्या हर्बर्ट सटक्लिफ यांच्या नावावर आहे. त्यांनी पदार्पण केल्यानंतर २४४ दिवसांतच नऊ कसोटींतील बारा डावांत हजार धावांचा टप्पा पार केला होता.

2024-03-07T13:26:36Z dg43tfdfdgfd