रोहित आणि विराटबाबत गांगुलींचे मोठे वक्तव्य, म्हणाले टी-२० वर्ल्ड कप खेळायचा असेल तर...

मुंबई : टी-२० वर्ल्ड कपचे वेध आता सर्वांनाच लागले आहेत. त्यामध्येच आता भारताचे माजी कर्णधार सौरव गांगुली यांनी रोहित शर्मा आणि विराट कोहली यांच्याबाबत एक मोठे वक्तव्य केलं आहे. रोहित आणि विराट यांना टी-२० वर्ल्ड कपमध्ये खेळायचे असेल तर त्यांनी कोणती एकच गोष्ट करावी, हे गांगुलीने सांगितले आहे.

रोहित आणि विराट काही वर्षे भारताच्या टी-२० संघात नव्हते, तेव्हा हार्दिक पंड्याकडे संघाचे नेतृत्व देण्यात आले होते. पण गेल्या काही दिवसांमध्येच रोहित आणि विराट हे भारताच्या टी-२० संघात दाखल झाले. त्यानंतर रोहित शर्माकडे टी-२० संघाचे कर्णधारपदही आले. त्यानंतर आता हार्दिक पंड्या मुंबई इंडियन्सचा कर्णधार आहे. पण त्याच्याकडून चांगली कामगिरी आणि नेतृत्वही होताना दिसत नाही. पण रोहित आणि विराट चांगल्या फॉर्मात आले आहेत. त्यामुळे जेव्हा टी-२० वर्ल्ड कपचा विचार केला जाईल, तेव्हा रोहित आणि विराट यांनी एकच गोष्ट करावी, असे गांगुली यांनी सांगितले आहे.

गांगुली रोहित आणि विराट यांच्याबाबत म्हणाले की, " टी-२० वर्ल्ड कप जवळ येत आहे. या वर्ल्ड कपसाठी रोहित आणि विराट यांची एकच गोष्ट करावी. या टी-२० वर्ल्ड कपमध्ये रोहित शर्मा आणि विराट कोहली या दोघांनीही सलामी करायला यावे, असे मला वाटते." रोहित आणि विराट हे दोघेही अनुभवी खेळाडू आहेत. रोहित तर सलामीवीर आहेच, पण कोहली हा भारतासाठी तिसऱ्या स्थानावर फलंदाजीला येतो. पण सध्याच्या आयपीएलमध्ये कोहली हा सलामीला येत आहे. सलामीला येत कोहलीने या आयपीएलमध्ये सर्वाधिक धावा आपल्या नावावर केल्या आहेत आणि त्याच्याकडेच ऑरेंज कॅप आहे. त्यामुळे रोहित आणि विराट जर सलामीला आले, तर भारताला दमदार सलामी मिळेल, असे गांगली यांना वाटत आहे.

विराट कोहलीकडून कर्णधारपद जेव्हा रोहित शर्माला देण्यात आले तेव्हा गांगुली बीसीसीआयचे अध्यक्ष होते. त्यावेळी विराट आणि गांगुली यांच्यामध्ये वाद झाला होता. या वादाच्या ठिणग्या अजूनही तप्त असल्याचे पाहायला मिळते. पण त्यानंतरही गांगुली यांनी एक माजी कर्णधार या नात्याने रोहित आणि विराट यांच्याबाबत एक मोठे वक्तव्य केले आहे.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-24T13:55:20Z dg43tfdfdgfd