रोहित शर्माचे दोन विक्रम सुनील नरिनने एकाच सामन्यात मोडले, षटकांसह विक्रमांचाही पाऊस...

कोलकाता : सुनील नरिनने आयपीएलमधील आपले पहिलेच शतक साजरे केले. हे शतक साजरे करताना सुनीलने चौकार आणि षटकारांचा पाऊस पाडलाच, पण त्याचबरोबर बरेच मोठे विक्रमही त्याने आपल्या नावावर केले. रोहित शर्माचे दोन मोठे विक्रम यावेळी सुनील नरिनने मोडल्याचेही पाहायला मिळाले.

रोहित शर्मा आणि सुनील नरिन हे दोघेही भन्नाट फॉर्मात आहेत. रोहित शर्माने गेल्या सामन्यात धमाकेदार फटकेबाजी केली होती. रोहितने चेन्नईविरुद्धच्या सामन्यात नाबाद १०५ धावांची खेळी साकारली होती. या शतकी खेळीत रोहितने बरेच विक्रम आपल्या नावावर केले होते. रोहितवंतर ट्रेव्हिस हेडचे

आरसीबीविरुद्ध शतक पाहायला मिळाले. पण या सामन्यात जे ट्रेव्हिस हेडला करता आले नाही ते सुनील नरिनने करून दाखवले आहे. कारण नरिनने एकाच सामन्यात रोहित शर्माचे दोन विक्रम मोडीत काढले आहेत.

सुनीलने या सामन्यात चौकारासह आपले शतक पूर्ण केले. नरिनचे हे आयपीएलमधील पहिले शतक ठरले, यापूर्वी त्याने ८५ धावा केल्या होत्या आणि ती त्याची सर्वाधिक धावसंख्या होती. पण यावेळी नरिनने ५६ चेंडूंत १३ चौकार आणि सहा षटकारांच्या जोरावर १०९ धावांची खेळी साकारली. नरिनने या वर्षीच्या आयपीएलमध्ये पहिल्या पॉवर प्लेमध्ये १२ षटकार मारण्याचा विक्रम आता आपल्या नावावर केला आहे. यापूर्वी हा विक्रम रोहित शर्माच्या नावावर होता. कारण रोहितने आतापर्यंत IPL 2024 मध्ये पॉवर प्ले मध्ये ११ षटकार लगावले होते. रोहितचा हा पहिला विक्रम सुनीलने मोडीत काढला आहे.

नरिनने या सामन्यात १०९ धावांची खेळी साकारली, तर रोहितला १०५ धावा करता आल्या होत्या. त्यामुळे या आयपीएलमध्ये एका डावात रोहित शर्मापेक्षा जास्त धावा करण्याचा विक्रम आता सुनीलच्या नावावर जमा झाला आहे. रोहितचा या आयपीएलमधील हा दुसरा विक्रमही सुनीनने मोडला आहे. हेडने शतक झळकानवले असले तरी त्याने १०२ धावा केल्या होत्या, त्यामुळे त्याला रोहितचा विक्रम मोडता आला नव्हता. पण आता सुनीलने या शतकासह रोहित शर्माचा सर्वाधिक धावांचा विक्रम मोडीत काढला आहे.

सुनील नरिनचे हे आतापर्यंतच्या आयपीएलमधले पहिले शतक ठरले. या पहिल्या शतकासह नरिनने सर्वांची मनं जिंकल्याचे पाहायला मिळाले.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-16T16:37:59Z dg43tfdfdgfd