रोहित शर्माच्या जागी मुंबई इंडियन्सच्या संघात कोणाला दिली संधी, पाहा संपूर्ण खेळाडूंची यादी

मुंबई : हार्दिक पंड्याने रोहित शर्माला मुंबई इंडियन्सच्या ११ खेळाडूंच्या संघातून बाहेर काढले. आतापर्यंत ही गोष्ट रोहितबाबत कधीच घडली नव्हती. पण रोहितला संघाबाहेर करत आता हार्दिकने सर्वात मोठी चूक केली आहे. रोहितच्या जागी एका युवा खेळाडूला हार्दिक पंड्याने संघात संधी दिली आहे.

रोहित शर्मा आणि हार्दिक पंड्या यांच्यातील वाद आता चव्हाट्यावर आल्याचे पाहायला मिळत आहे. या वादात हार्दिक पंड्याच प्रत्येक वेळी तेल ओतत असल्याचे पाहायला मिळत आहे. आता तर हार्दिकने चक्क रोहित शर्माला मुंबई इंडियन्सच्या संघाबाहेर केले आहे. एका युवा खेळाडूसाठी हार्दिकने रोहितला बाकावर बसवले आहे. त्यामुळे हार्दिक आता पुन्हा एकदा ट्रोल व्हायला लागला आहे.

हार्दिकला मुंबई इंडियन्सचा कर्णधार बनवले आणि तेव्हापासून तो ट्रोल व्हायला लागला आहे. चाहत्यांनी हार्दिकला जोरदार ट्रोल करायला सुरुवात केली होती. पण एका सामन्यात रोहितच हार्दिकला ट्रोल करू नका, असे सांगत होता. त्यानंतर टी-२० वर्ल्ड कपचा संघ निवडताना रोहित शर्मा हार्दिकवरील राग काढेल, असे वाटत होते. कारण हार्दिक पंड्या हा चांगल्या फॉर्मात नव्हता. पण भारताच्या टी-२० संघात हार्दिकला संधी तर दिलीच,पण त्याचबरोबर त्याला उप कर्णधारही बनवले. त्यामुळे हार्दिक आणि रोहित यांच्यात सारे आलबेल झाल्याचे म्हटले जात होते. पण त्यानंतर आता तर हार्दिकने रोहित शर्माला संघाबाहेरच काढले आहे.

रोहितला संघाबाहेर करताना हार्दिकने आता हरयाणाच्या नमन धीरला मुंबईच्या संघात संधी दिली आहे. नमन हा ऑफ स्पिनर आहे आणि वरच्या क्रमांकावर तो फलंदाजीही करू शकतो. त्यामुळे तो रोहितसाठी योग्य पर्याय ठरू शकतो, असे हार्दिकने सांगण्याचा प्रयत्न केला आहे. पण हा प्रयत्न त्याच्या अंगाशी येणार असल्याचे स्पष्ट दिसत आहे. कारण जेव्हा मुंबई इंडियन्सच्या खेळाडूंना मार पडतो, तेव्हा रोहित शर्माच त्यांना मार्गदर्शन करायला येतो. पण या सामन्यात मात्र रोहित शर्मा मार्गदशन करण्यासाठी उपलब्ध नसेल.

हार्दिक पंड्याने रोहितसारख्या अनुभवी खेळाडूला संघाबाहेर करत मोठी चूक तर केलीच आहे, पण तो आता पुन्हा टीकेचा धनी ठरणार आहे.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-05-03T14:55:39Z dg43tfdfdgfd