रोहित शर्मा फक्त २-३ वर्षांचा पाहुणा, पण हार्दिक मात्र... सिद्धू नेमकं काय म्हणाले पाहा

मुंबई : रोहित शर्माकडून मुंबई इंडियन्सने कर्णधारपद काढून घेतले आणि हार्दिकला नवा कर्णधार बनवला. पण या विषयावर आता भारताचे माजी क्रिकेटपटू आणि समालोचक नवज्योत सिंग सिद्धू यांनी एक मोठे वक्तव्य केले आहे.

हार्दिकला जेव्हा मुंबईच्या संघाचे कर्णधार बनवले गेले, तेव्हा त्याला जोरदार ट्रोल करण्यात आले होते. आयपीएलला सुरुवात होण्यापूर्वीही हार्दिकला ट्रोल केले जात होते. त्यामध्येच मुंबई इंडियन्सचा संघ हा सलग तीन सामने पराभूत झाला. त्यामुळे हार्दिकचे ट्रोलिंग वाढले. पण आता मुंबई इंडियन्सने पहिला सामना जिंकल्यावर मात्र हार्दिकचे ट्रोलिंग बंद झाले. पण आता सिद्धू यांनी हार्दिक आणि रोहित यांच्याबाबत मोठे वक्तव्य केले आहे.

सिद्धू यावेळी म्हणाले की, " मी काही हार्दिक पंड्याची वकिली करत नाही. हार्दिकला भारताच्या कसोटी संघाचे कर्णधारपद द्यावे, असे मी म्हणत नाही. पण हार्दिकने आतापर्यंत बऱ्याच गोष्टी संघासाठी चांगल्या केल्या आहेत. रोहित शर्मा जेव्हा भारतासाठी टी-२० क्रिकेट खेळत नव्हता तेव्हा हार्दिक नेतृत्व करत होता. त्यामुळे हार्दिकला विसरून किंवा डावलून चालणार नाही."

सिद्धू यांनी पुढे सांगितले की, "हार्दिक पंडया हे संघाचे भविष्य आहे, असे मला तरी वाटते. रोहित शर्मा हा जास्तीत जास्त २-३ वर्षे क्रिकेट खेळू शकतो. रोहित हा एक उत्तम कर्णधार आहे, यात वादच नाही. पण कालानुरुप आपली भूमिका बदलायला हवी, असे मला वाटते. रोहित शर्माने संघासाठी बऱ्याच गोष्टी चांगल्या केल्या आहेत. पण आता भविष्यही पाहायला हवे आणि त्यासाठी चांगले व्यासपीठ आपण तयार करून द्यायला हवे. माझ्यामते हे रोहित शर्माने केले आहे. त्यामुळे आता यापुढे हार्दिकच्या हातात संघाची सुत्रे असायला हवीत, असे मला वाटते."

मुंबई इंडियन्सचा गुरुवारी सामना हा आरसीबीबरोबर होणार आहे. या सामन्यासाठी दोन्ही संघ सज्ज झाले असून त्यांचे संघ काय असू शकतात, हेदेखील आता समोर आले आहे.

मुंबई इंडियन्स : इशान किशन (यष्टीरक्षक), रोहित शर्मा, नमन धीर, सूर्यकुमार यादव, तिलक वर्मा, हार्दिक पांड्या (कर्णधार), टिम डेव्हिड, गेराल्ड कोटजी, पीयूष चावला, जसप्रीत बुमराह, आकाश माधवल.

संभाव्य प्रभाव खेळाडू : रोमारिओ शेफर्ड, मोहम्मद नबी, शम्स मुलानी, श्रेयस गोपाल.

रॉयल चॅलेंजर्स बेंगळुरू : विराट कोहली, विल जॅक्स, फाफ डु प्लेसिस (कर्णधार), रजत पाटीदार, ग्लेन मॅक्सवेल, महिपाल लोमरोर, दिनेश कार्तिक (यष्टीरक्षक), आकाशदीप, रीस टॉपले, मोहम्मद सिराज, यश दयाल.

संभाव्य प्रभाव खेळाडू : मयंक डागर, विजयकुमार वैशाख, कर्ण शर्मा, अनुज रावत.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-11T12:16:28Z dg43tfdfdgfd