रोहित शर्मा रचणार इतिहास, आयपीएलमधील सर्वात मोठा रेकॉर्ड हिटमॅनच्या नावावर होणार

नवी दिल्ली : रोहित शर्माच्या शिरपेचात अजून एक मानाचा तुरा खोवला जाणार आहे. कारण आयपीएलमधला एक मोठा विक्रम आता रोहित शर्माच्या नावावर होणार आहे. सध्या आंतरराष्ट्रीय स्तरावर खेळत असलेल्या एकाही खेळाडूला हा विक्रम आतापर्यंत करता आलेला नाही.

रोहित शर्मा हा सध्या भन्नाट फॉर्मात आहे. गेल्या सामन्यात रोहितने नाबाद शतक झळकावले होते. रोहितला यावेळी मुंबईच्या एकाही खेळाडूची चांगली साथ मिळाली नाही आणि त्यामुळेच रोहितला मुंबई इंडियन्सला विजय मिळवून देता आला नाही. पण आता पंजाब किंग्सविरुद्धच्या सामन्यासाठी रोहितने कसून सराव केला आहे. या सामन्यात रोहित शर्माच्या नावावर आयपीएलच्या इतिहासातील एक मोठा विक्रम नोंदवला जाणार आहे.

रोहितने मुंबई इंडियन्सला सर्वाधिक पाच जेतेपदं मिळवून दिली होती. पण यावर्षी त्याला मुंबई इंडियन्सने कर्णधारपदावरून हटवले. पण तरीही या गोष्टीचा परीणाम रोहित शर्माच्या कामगिरीवर झालेला नाही. रोहित हा मुंबई इंडियन्सकडून खेळणारा सर्वात यशस्वी फलंदाज ठरलेला आहे. त्याचबरोबर रोहितच्या नावावर आता सर्वात मोठा विक्रमही नोंदवला जाणार आहे. रोहित जेव्हा पंजाब किंग्सविरुद्धच्या सामन्यात मैदानात उतरेल, तेव्हा त्याच्या नावावर एक मोठा विक्रम होणार आहे. कारण रोहित शर्माचा हा आयपीएलमधील २५० वा सामना असणार आहे. मुंबई इंडियन्सकडून एकही खेळाडू एवढे सामने खेळू शकलेला नाही. त्याचबरोबर सध्याच्या घडीला आंतरराष्ट्रीय स्तरावर खेळणारा एकही खेळाडू आयपीएलमध्ये २५० सामने खेळू शकलेला नाही. त्यामुळे रोहित शर्माच्या नावावर हा मोठा विक्रम पंजाब किंग्सच्या सामन्यात होणार आहे. आतापर्यंत फक्त एकच खेळाडू आयपीएलमध्ये २५० सामने खेळू शकलेला आहे.

आयपीएलमध्ये रोहितपूर्वी फक्त एकच खेळाडू २५० सामने खेळला आहे आणि तो खेळाडू आहे महेंद्रसिंग धोनी. धोनीने यापूर्वी आयपीएलमध्ये २५० पेक्ष जास्त सामने खेळले आहेत. त्यामुळे रोहित हा आयपीएलमध्ये २५० सामने खेळणार दुसरा खेळाडू ठरला आहे. पण सध्या आंतरराष्ट्रीय क्रिकेट खेळणाऱ्या खेळाडूंमध्ये मात्र रोहितचा पहिला नंबर लागलेला आहे.

रोहित शर्मासाठी हा २५० वा सामना सर्वात महत्वाचा असेल. त्यामुळे रोहित या सामन्यात कशी कामगिरी करतो, याकडे सर्वांचे लक्ष लागलेले असेल. रोहितने गेल्या सामन्यात शतक झळकावले होते, त्यामुळे रोहित या सामन्यात सलग दुसरे शतक झळकावणार का, याची उत्सुकता आता चाहत्यांना असणार आहे.

मुंबई इंडियन्सला फक्त दोनच विजय मिळवता आले आहेत. त्यामुळे मुंबई इंडियन्स या सामन्यात विजय मिळवतो का, याकडे चाहत्यांचे लक्ष असेल. मुंबईने जर या सामन्यात विजय मिळवला तर त्यांचा तो तिसरा विजय असेल आणि पॉइंट्स टेबलमध्ये त्यांचे सहा गुण होऊ शकतात.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-18T11:55:14Z dg43tfdfdgfd