रोहित शर्मासाठी मी जीवदेखील देईन... आई बेशुद्ध झाल्यावर काय घडलं ते अश्विनने सर्व सांगितलं
नवी दिल्ली : भारताचा अष्टपैलू रवीचंद्रन अश्विनच्या आयुष्यात एक अशी घटना घडली की, त्याचा विचारही आपण करू शकत नाही. पण या कठीण परिस्थितीत कर्णधार रोहित शर्मा एक व्यक्ती म्हणून त्याच्या पाठिशी कसा उभा राहीला आणि त्याने कशी मदत केली, हे अश्विनने आता सांगितले आहे. अश्विनची आई बेशुद्ध झाली होती आणि त्यानंतर रोहित शर्मा नेमकं काय म्हणाला, हे आता अश्विनने सांगितलं आहे.
अश्विन म्हणाला की, " मी ५०० विकेट्स पूर्ण केल्या. त्यानंतर सर्वांनी कौतुक केले. पत्रकार परिषदेमध्येही मी जाऊन आलो, पण घरून फोन आला नव्हता. मला वाटलं ते अभिनंदन स्विकारण्यात किंवा मीडियाशी बोलण्यात बिझी असतील. आई-वडिलांशीही माझा संपर्क होत नव्हता. त्यावेळी मी माझ्या पत्नीला फोन केला. तेव्हा प्रीतीचा आवाज हा तुटक, तुटक येत होता. तिने मला सांगितले की, आईचं डोकं दुखत होतं. त्याचं प्रमाण एवढं वाढलं की तिला चक्कर आली आणि ती बेशुद्ध झाली. त्यामुळे आम्ही तुला फोन करू शकलो नाही. तुझा फोनही लागत नव्हता. त्यावेळी मी रोहित शर्मा आणि राहुल द्रविड यांना फोन केला. मी विचार करत असताना रोहित आला आणि म्हणाला की, तु लगेच घरी जाण्यासाठी निघायला हवे. पण सकाळपर्यंत चेन्नईला जाण्यासाठी एकही विमान नव्हते."
अश्विनने पुढे सांगितले की, " मी घरी कसा जाईन, याची काळजी रोहितला होती. चेतेश्वर पुजारा जेव्हा ही गोष्ट समजली तेव्हा त्याने मला चेन्नईला जाण्यासाठी चार्टर प्लेनची व्यवस्था केली. रोहितने यावेळी फिजिओ कमलेशला माझ्याबरोबर पाठवले. रोहित फक्त एवढ्यावर थांबला नाही तर तो ठराविक वेळाने कमलेशला फोन करत होता आणि माझ्याबाबत विचारत होता. आतापर्यंत मी रोहितसारखी व्यक्ती पाहिलेली नाही. रोहितने या संपूर्ण कालावधीत माझी काळजी घेतली."
अश्विनने पुढे सांगितले की, " आयुष्यात बऱ्याच गोष्टी घडतात. पण अशा गोष्टींच्या वेळी तुम्हाला कोण मदत करतं, त्याला तुम्ही विसरू शकत नाही. ही गोष्ट रोहितबाबत आहे. रोहितला मी कधीही विसरू शकणार नाही. त्यामुळे जर रोहित शर्मासाठी जीव देण्याची वेळ आली तरी मी देईन. कारण त्याने एक व्यक्ती म्हणून माझ्यासाठी जी गोष्ट केली आहे ती मी कधीही विसरू शकणार नाही."
अश्विन अडचणीत असताना रोहित शर्मा हा सावलीसारखा त्याच्याबरोबर होता. ही गोष्ट अश्विनही विसरू शकलेला नाही.
2024-03-13T10:42:18Z dg43tfdfdgfd