वानखेडेच्या मैदानावर मुंबईकरच आमने सामने, रोहित व अजिंक्यसह किती खेळाडू आहेत जाणून घ्या...

मुंबई : वानखेडेवर मुंबई इंडियन्स आणि चेन्नई सुपर किंग्स यांच्यातील सामना चाहत्यांसाठी पर्वणी असेल. पण त्याचबरोबर या सामन्यात मुंबईकरच खेळाडू आमने सामने येणार असल्याचे पाहायला मिळणार आहे. त्यामुळे चाहत्यांना हा एक अनोखा सामनाही यावेळी पाहायला मिळणार आहे. कारण मुंबईच्या चाहत्यांना आपले लाडके खेळाडू एकाच वेळेला बऱ्याच दिवसांनी मैदानात पाहायला मिळणार आहेत.

रोहित शर्मा आणि अजिंक्य रहाणे यांची जोडी जगप्रसिद्ध आहे. या दोघांच्या मैत्रीचे किस्से क्रिकेटच्या मैदानात ऐकवले जातात. पण हे दोघेच आज आमने सामने पाहायला मिळणार आहेत. त्याचबरोबर चेन्नई सुपर किंग्सच्या संघात मुंबई इंडियन्सपेक्षा जास्त मुंबईकर असल्याचे पाहायला मिळत आहे. त्यामुळे वानखेडेवर या मुंबईच्या खेळाडूंना चांगलाच फायदा होऊ शकतो.

वानखेडे स्टेडियमवर रविवारी मुंबई इंडियन्स-चेन्नई सुपर किंग्ज यांच्यातील लढत होणार आहे. मुंबईतील वानखेडे स्टेडियमवर होणारा हा सामना मुंबईकर खेळाडूंतीलच लढत असेल. अजिंक्य रहाणे, शिवम दुबे, तुषार देशपांडे, शार्दूल ठाकूर हे चेन्नई संघातील प्रमुख खेळाडू मुंबईकडून देशांतर्गत स्पर्धेत खेळतात, त्याचा फायदा चेन्नईच्या संघाला होऊ शकेल. मुंबई इंडियन्सकडे रोहित शर्मा आणि सूर्यकुमार यादव हे मुंबईकर खेळाडू आहेत.

मुंबईने वानखेडे स्टेडियमवरील गेल्या दोन सामन्यांत विजय मिळवला आहे. मुंबईला घरच्या मैदानावरील हॅट्‌‌ट्रिकपासून रोखण्याचा चेन्नईचा प्रयत्न असेल. त्यात डावास स्थैर्य देणारा अजिंक्य रहाणे, कोणत्याही गोलंदाजीवर हल्ला करू शकणारा शिवम दुबे; तसेच चेन्नईच्या गोलंदाजीचा आधारस्तंभ होत असलेला तुषार देशपांडे आपल्याला घडवण्यात मोलाचा वाटा असलेल्या वानखेडे स्टेडियवर प्रभावी ठरू शकतात. त्यामुळे मुंबई इंडियन्ससमोर आव्हान सोपे नसेल. याचबरोबर 'वानखेडे'वर यशस्वी ठरलेल्या शार्दूल ठाकूरलाही चेन्नई संधी देण्याचा विचार करू शकेल.

मुंबई आणि चेन्नई यांच्यातील संघर्ष पारंपरिक आहे. दोघांनी प्रत्येकी पाच वेळा ही स्पर्धा जिंकली आहे; मात्र दोघांतील गेल्या पाचपैकी चार लढतींत चेन्नईने बाजी मारली आहे. त्यातही त्यांनी गेल्या मोसमात मुंबईला वानखेडे स्टेडियमवर पाच विकेटनी पराभूत केले होते. मात्र, मुंबईच्या बहरत असलेल्या फलंदाजीमुळे आपल्यासमोरील आव्हान सोपे नाही, याची जाणीव चेन्नईला आहे.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-14T12:15:16Z dg43tfdfdgfd