विराट कोहली मैदानातच पंजाबच्या खेळाडूवर भडकला, व्हिडिओमध्ये पाहा नेमकं घडलं तरी काय...

नवी दिल्ली : विराट कोहली हा मैदानात नेहमीच आक्रमक असतो. कोहली रविवारी सामना सुरु असताना पंजाबच्या खेळाडूला मैदानात भिडला होता. या गोष्टीचा व्हिडिओ आता चांगलाच व्हायरल झाला आहे.

ही गोष्ट घडली ती १३ व्या षटकाच्या सुरुवातीला जेव्हा ग्लेन मॅक्सवेल हा स्ट्राइकवर होता आणि विराट कोहली हा नॉन स्ट्राइकला उभा होता. आरसीबीचा त्यावेळी १२ षटकांनंतर ३ बाद १०३ अशी अवस्था होती. त्यावेळी पंजाब किंग्सचा हरप्रीत ब्रार हा गोलंदाजी करण्यासाठी सज्ज झाला होता. सामना हा चांगलाच रंगलेला होता. मॅक्सवेल हा नुकताच मैदानात आला होता आणि त्याने तीन धावा केल्या होत्या, तर कोहली ६३ धावांवर खेळत होता. त्यामुळे आरसीबीच्या संघासाठी ही जोडी सर्वात महत्वाची होती. त्यावेळीच ही गोष्ट मैदानात घडल्याचे पाहायला मिळाले.

मॅक्सवेल स्ट्राइकवर असताना तो क्षेत्ररक्षण पाहत होता आणि कुठे फटके मारायचे याची रणनिती आखत होता. मॅक्सवेलने स्ट्राइक घेतला नव्हता. पण त्याचवेळी ब्रार हा मॅक्सवेलला चेंडू टाकण्यासाठी पुढे सरसावला होता. पण मॅक्सवेल त्यावेळी या चेंडूचा सामना करण्यासाठी तयार नव्हता. त्यावेळीच कोहली हा मॅक्सवेलवर चांगलाच भडकल्याचे पाहायला मिळाले. कोहलीने ब्रारला गोलंदाजी करण्यापासून थांबवले आणि त्याला म्हणाला की, " मॅक्सवेलला श्वास घ्यायला तरी वेळ देशील की नाही." कोहलीचा स्वर हा वरच्या पट्ट्यात होता. त्यामुळे ब्रारला नेमकं काय घडलं ते समजले आणि परिस्थितीती जाणीव झाली. त्यामुळे त्याने कोहलीला उत्तर देणे टाळले आणि तो पुन्हा आपल्या रन अपवर चेंडू टाकण्यासाठी गेला. हा सर्व प्रकार मॅक्सवेल पाहत होता. कोहलीने जेव्हा ब्रारला सुनावले त्यानंतर मॅक्सवेल या गोष्टीवर हसला. विराट कोहली यापूर्वीही पहिल्या सामन्यात भडकला होता.

विराट कोहली यापूर्वी पहिल्या सामन्यात रवींद्र जडेजावर भडकला होता. त्यावेळी आरसीबीचा कॅमेरून ग्रीन हा फलंदाजी करत होता. ग्रीनला कोणताही वेळ न देता जडेजा गोलंदाजी करायला गेला होता. त्यावेळी कोहलीने जडेजालाही असेच सुनावले होते.

2024-03-26T07:44:04Z dg43tfdfdgfd