विराट कोहलीला मागे टाकत यशस्वी जयस्वाल ठरला नंबर १, पाहा कोणता विक्रम रचला...

दिगंबर शिंगोटे : भारताचा सलामीवीर यशस्वी जयस्वालने इंग्लंडविरुद्धच्या कसोटी मालिकेत चांगली छाप पाडली असून, त्याने आपल्या कामगिरीद्वारे दिग्गज फलंदाज विराट कोहलीला एका बाबतीत मागे टाकले. त्यामुळे आता यशस्वी हा नंबर १ खेळाडू ठरला आहे.

भारत आणि इंग्लंड यांच्यातील कसोटी क्रिकेट मालिकेत यशस्वीने धमाकेदार कामगिरी केली आहे. त्याने गेल्या चार कसोटींत ६५५ धावा केल्या होत्या. इंग्लंडविरुद्ध कसोटी मालिकेत एवढ्या धावा करणारा तो दुसराच भारतीय फलंदाज ठरला होता. यापूर्वी, विराट कोहलीनेही इंग्लंडविरुद्ध पाच कसोटींच्या मालिकेत आठ डावांत १०९.१६च्या सरासरीने दोन शतके आणि दोन अर्धशतकांसह ६५५ धावा केल्या होत्या. अर्थात, इंग्लंडविरुद्ध एका कसोटी मालिकेत सर्वाधिक धावांच्या बाबतीत यशस्वीने विराट कोहलीसोबत बरोबरी साधली होती. गुरुवारी धरमशाला कसोटीत यशस्वीने ५७ धावांची खेळी केली आणि इंग्लंडविरुद्ध एकाच मालिकेत सर्वाधिक धावांच्या बाबतीत विराटला मागे टाकले.

याशिवाय भारत आणि इंग्लंड यांच्यातील कसोटी मालिकेत सातशेहून अधिक धावा करणारा यशस्वी तिसराच फलंदाज ठरला. यापूर्वी, भारताविरुद्धच्या मालिकेत इंग्लंडच्या ग्रॅहम गूच आणि जो रुट यांनी सातशेहून अधिक धावा केल्या होत्या. १९९०मध्ये भारतीय संघ इंग्लंड दौऱ्यावर गेला होता. त्या वेळी भारतीय संघाने इंग्लंडविरुद्ध तीन कसोटींची मालिका खेळली होती. त्या मालिकेत गूच यांनी १२५.३३च्या सरासरीने ७५२ धावा केल्या होत्या. हा विक्रम अजून अबाधित आहे. हा विक्रम मोडण्याची संधी यशस्वीला आहे. अर्थात, त्यासाठी यशस्वीला धरमशाला कसोटीतील दुसऱ्या डावात ४१ किंवा त्याहून अधिक धावा कराव्या लागणार आहेत. याशिवाय २०२१-२२मध्ये मायदेशात जो रुटने भारताविरुद्ध पाच कसोटींत १०५.२८च्या सरासरीने ७३७ धावा केल्या होत्या.

भारताकडून आतापर्यंत तीनच फलंदाजांना इंग्लंडविरुद्धच्या कसोटी क्रिकेट मालिकेत सहाशेहून अधिक धावा करता आल्या आहेत. यात पहिल्या क्रमांकावर यशस्वी (७१२), दुसऱ्या क्रमांकावर विराट कोहली (६५५), तर तिसऱ्या क्रमांकावर राहुल द्रविड (६०२) आहे. पण या यादीत आता यशस्वी जयस्वाल अव्वल स्थानावर विराजमान झाला आहे.

2024-03-07T13:56:38Z dg43tfdfdgfd