विराटबाबत गंभीरचे मोठे विधान, कोहलीवर होणाऱ्या टीकेवर दिले सडेतोड उत्तर

नवी दिल्ली : विराट कोहली हा चांगल्या फॉर्मात आला आहे. गेल्या दोन्ही सामन्यांत त्याने अर्धशतकं झळकावली. पण तरीही कोहली हा ट्रोल होताना दिसत आहे. कारण कोहलीपेक्षा बाकीचे खेळाडू कमी चेंडूंत जास्त धावा करत आहेत. याबाबत आता गौतम गंभीरने एक मोठे वक्तव्य केले आहे.

विराट कोहलीने गुजरातच्या सामन्यात ४४ चेंडूंत ७० धावांची खेळी साकारली, पण आरसीबीच्या विल जॅक्सने ४१ चेंडूंतच १०० धावांची तुफानी खेळी साकारली. यावेळी कोहलीपेक्षा कमी चेंडूंमध्ये जॅक्सने जास्त धावा केल्याचे पाहायला मिळाले. यापूर्वी आरसीबीचा सामना हैदराबादच्या संघाबरोबर होता. या सामन्यात विराट कोहलीने ४३ चेंडूंत ५१ धावा केल्या होत्या, रजत पाटीदारने याच सामन्यात २० चेंडूंत ५० धावांची खेळी साकारली होती. या दोन्ही सामन्यांत विराट कोहलीने अर्धशतकं झळकावली खरी, पण त्याच्यापेक्षा कमी चेंडूंत त्यांच्या संघातील अन्य फलंदजांनी कमी चेंडूंत जास्त धावा केल्या. त्यामुळे कोहलीच्या फलंदाजीवर आता प्रश्नचिन्ह उपस्थित केले जात आहे. गंभीरने या गोष्टीवर प्रकाशझोत टाकला आहे.

गंभीर यावेळी म्हणाला की, " टी-२० क्रिकेट म्हटले की चर्चा होते ती फलंदाजांच्या स्ट्राइक रेटची. पण मला विचाराल तर स्ट्राइक रेटपेक्षा संघाचा विजय महत्वाचा आहे. कारण तुम्ही जर संघाला विजय मिळवून देत असाल तर त्यावेळी तुमचा स्ट्राइक रेट नेमका किती आहे, याचा विचार केला जात नाही. तुम्ही टी-२० क्रिकेटमध्ये १०० च्या स्ट्राइक रेटने फलंदाजी केली आणि संघाला विजय मिळवून दिला तर तुम्हाला कोणी काही विचारणार नाही. कारण सर्वात महत्वाचा हा विजय असतो. त्यामुळे माझ्यासाठी संघातचा विजय महत्वाचा आहे, स्ट्राइक रेट नाही." विराट कोहलीचा स्ट्राइक रेट हा संघातील अन्य खेळाडूंपेक्षा कमी आहे आणि त्यामुळेच त्याच्यावर टीका केली जात आहे. पण यावेळी गंभीरने मात्र विराटची बाजू घेतल्याचे पाहायला मिळत आहे. विराट कोहलीचा स्ट्राइक रेट कमी असला तरी तो संघाला विजय मिळवून देत आहे आणि हीचच गोष्ट गंभीरने अधोरेखित केली आहे.

गेल्या दोन्ही सामन्यांत विराट कोहलीने अर्धशतक झळकावले आहे आणि संघाच्या विजयात मोलाचा वाटा उचलला आहे.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-28T15:05:56Z dg43tfdfdgfd