शुभमन गिलने चेन्नईचा सामना सुरु होण्यापूर्वी मागितली माफी, व्हिडिओमध्ये पाहा काय घडलं...

चेन्नई : गुजरात टायटन्सचा कर्णधार शुभमन गिलने चेन्नई सुपर किंग्सचा सामना सुरु होण्यापूर्वीच माफी मागितल्याचे पाहायला मिळाले. या गोष्टीचा व्हिडिओ सध्याच्या घडीला चांगलाच व्हायरल झाला आहे.

गिलच्या नेतृत्वाखाली गुजरातच्या संघाने पहिल्या सामन्यात विजय मिळवला, त्यांनी मुंबई इंडियन्ससारख्या दिग्गज संघाला पराभूत केले. पण त्यानंतर गुजरातचा संघ हा चेन्नईत दाखल झाला. कारण त्यांचा दुसरा सामना हा चेन्नई सुपर किंग्सबरोबर होता. चेन्नईच्या संघानेही पहिला सामना जिंकला होता. चेन्नईने पहिल्या सामन्यात आरसीबीवर विजय मिळवला होता. पण या दुसऱ्या सामन्यापूर्वी गिलने सर्वांसमोर माफी मागितली आहे.

ही गोष्ट घडली ती टॉसच्या वेळी. भारताचे माजी खेळाडू संजय मांजरेकर हे टॉससाठी आले होते. त्यांच्याबरोबर चेन्नईचा कर्णधार ऋतुराज गायकवाड आणि गिल हे दोघेही होते, यावेळी ऋतुराजने नाणे उडवले आणि गिलने कौल मागितला. हा टॉस यावेळी गिलने जिंकल्याचे पाहायला मिळाले. संजय मांजरेकर यांनी गुजरातने टॉस जिंकला आहे, असे घोषितही केले. त्यानंतर आता गुजरातचा कर्णधार गिल काय निर्णय घेणार, याकडे सर्वांचे लक्ष लागलेले होते. त्यावेळी गिलने प्रथम आपण फलंदाजी करणार असल्याचे सांगितले. त्यानंतर गिलला आपण निर्णय घेताना काही तरी चूक झाली आहे, असे त्याला वाटले. त्यानंतर गिलने सर्वांची माफी मागितली आणि म्हणाला की, " टॉस जिंकल्यावर आम्हाला प्रथम फलंदाजी नाही तर गोलंदाजी करायची आहे." गिल यावेळी चांगलाच दडपणखाली असल्याचे पाहायला मिळाले. कारण टॉस जिंकल्यावर नेमका काय निर्णय घ्यायचा आहे, हे त्याला स्पष्टपणे सांगता आले नाही. यावेळी एक हशा पिकला खरा. पण आपण प्रथम गोलंदाजी करणार असल्याचे गिलने त्यानंतरही स्पष्ट केले. त्यामुळे चेन्नईचा संघ यावेळी प्रथम फलंदाजी करण्यासाठी मैदानात उतरणार असल्याचे समोर आले.

चेन्नई आणि गुजरात यांच्यातील हा सर्वात महत्वाचा सामना असेल. कारण दोन्ही संघांनी आपले पहिले सामने जिंकले आहेत. त्यामुळे या सामन्यात कोणता संघ विजयात सातत्य राखतो आणि कोणता संघ पहिला पराभव पत्करतो, याकडे सर्वांचे लक्ष लागलेले असेल.

2024-03-26T14:59:42Z dg43tfdfdgfd