सारे संपले असे वाटेल तेव्हा अधिक खंबीर व्हा- रोईंग खेळाडू स्मिता यादव यांचे ‘डेरवण यूथ गेम्स’चे उद्घाटन करताना प्रतिपादन

चिपळूण : ‘सारे काही संपले असे वाटेल तेव्हा जास्त खंबीर व्हा. पुरंदरच्या तहामध्ये २३ किल्ले दिल्यानंतर सगळे स्वराज्य संपले असे वाटत होते. पण छत्रपती शिवाजी महाराजांची आशा व कर्तृत्व जिवंत होते. आयुष्यात अशीच जिद्द ठेवा, विजयाचा ध्वज फडकल्याशिवाय राहणार नाही’, असे प्रतिपादन रोईंग क्रीडा प्रकारात शिवछत्रपती पुरस्कार मिळविलेल्या पहिल्या महिला खेळाडू स्मिता शिरोळे-यादव यांनी केले. डेरवण येथे श्री विठ्ठलराव जोशी चॅरिटीज ट्रस्टतर्फे (Ḥएसव्हीजेसीटी) शिवजयंतीनिमित्त आयोजित करण्यात आलेल्या ‘डेरवण युथ गेम्स’च्या या राज्यस्तरीय क्रीडा महोत्सवाच्या उद्घाटन कार्यक्रमात त्या बोलत होत्या. ‘डीवायजी’चे उद्घाटन स्मिता शिरोळे-यादव यांच्या हस्ते झाले.

२१ ते २८ मार्च या दरम्यान आठवडाभर हा क्रीडा महोत्सव चालणार असून, एसव्हीजेसीटीच्या क्रीडा संकुलात क्रीडा स्पर्धांना प्रारंभ झाला आहे. कबड्डी, खो-खो, जलतरण, बॅडमिंटन, टेबल टेनिस, बुद्धीबळ, नेमबाजी, कॅरम, अॅथलेटीक्स अशा विविध खेळांच्या स्पर्धा येथे रंगणार आहेत. मुंबई, पुणे, कोल्हापूर, सांगली, सातारा, रत्नागिरी, सिंधुदुर्ग येथून शेकडो खेळाडू येथे दाखल झाले आहेत. उद्घाटनपर भाषणात शिरोळे यांनी ‘कोकण ऑलिम्पिक’ म्हणून ओळखल्या जाणाऱ्या यंदाच्या दहाव्या ‘डेरवण युथ गेम्स’च्या तयारीचे कौतुक केले. ‘विद्यार्थ्यांना खेळात करिअर करण्याच्या दृष्टीने अनेक संधी आहेत. शिक्षण असो की खेळ आपण शंभर टक्के योगदान दिले, तर हमखास यश मिळते’, असा सल्ला त्यांनी खेळाडूंना दिला.

उद्घाटन समारंभाला व्यासपीठावर उद्योजक कमलेश जोशी, बी.के.एल. वालावलकर हॉस्पिटलचे रेडियोलॉजिस्ट डॉ. नेताजी पाटील, क्रीडा संचालक श्रीकांत पराडकर, डेरवण येथील शाळेच्या संचालिका शरयू यशवंतराव यांची प्रमुख उपस्थिती होती. उद्योजक कमलेश जोशी आपल्या भाषणात म्हणाले की, ‘शारीरिक तंदुरुस्तीसाठी व्यायाम आणि खेळ या दोन्ही गोष्टी आवश्यक आहेत. आपण शारीरिकदृष्ट्या तंदुरुस्त असलो तरच व्यावहारिक जगात आपण आपली कार्यं व्यवस्थितरीत्या पार पाडू शकतो. खिलाडू वृत्तीचे खूप मोठे महत्त्व खेळात आहे.’

खेळातून व्यायाम होतो. व्यायाम हा बिनपैशांचा डॉक्टर आहे. असे संस्थेच्या संचालिका सौ. शरयू यशवंतराव यांनी सांगितले. या कार्यक्रमाची सुरुवात प्रमुख पाहुण्यांच्या हस्ते ध्वजारोहण करून करण्यात आली. तर एसव्हीजेसिटी शाळेच्या विद्यार्थ्यांनी यावेळी राज्यगीत सादर केले. प्रमुख पाहुण्यांच्या हस्ते क्रीडाज्योत प्रज्वलित करण्यात आली.

‘रोईंग’ या क्रीडा प्रकारात केलेल्या अतुलनीय कामगिरीबद्दल स्मिता शिरोळे-यादव यांना राष्ट्रपती ए.पी.जे अब्दुल कलाम यांच्या हस्ते मेजर ध्यानचंद पुरस्कार मिळाला होता. हा पुरस्कार आणि शिवछत्रपती पुरस्कार हे दोन्ही पुरस्कार मिळविणाऱ्या त्या पहिल्याच महिला खेळाडू ठरल्या. ‘ग्रामीण भागातील मूलभूत गरजा ओळखून, एकाच ठिकाणी रुग्णसेवा, शिक्षण, क्रीडा यासारख्या विविध गोष्टी सेवाभाव ठेवून केले जाणारे संस्थेचे कार्य अविस्मरणीय आहे. कबड्डी, खो-खो या खेळांसाठी इनडोअर स्टेडियम मला पहिल्यांदाच पाहायला मिळाले’, असेही त्यांनी आपल्या भाषणात सांगितले.

2024-03-21T15:03:12Z dg43tfdfdgfd