हार्दिकच्या मदतीसाठी रोहितने हात जोडले, व्हिडिओमध्ये पाहा मैदानात नेमकं घडलं तरी काय...

मुंबई : हार्दिक पंड्या आणि रोहित शर्मा यांच्यात विस्तवही जात नसल्याचे म्हटले जात होते. रोहित आणि हार्दिक यांच्यामधील वाद विकोपाला पोहोचला आहे, असेही म्हटले जात होते. पण वानखेडेवरील सामन्यात रोहित शर्माच हार्दिक पंड्याच्या मदतीला धावून आल्याचे समोर आले आहे. या गोष्टीचा व्हिडिओ सध्याच्या घडीला व्हायरल झाला आहे.

वानखेडेचा सामना सुरु होण्यापूर्वी हार्दिक पंड्याला चाहत्यांनी चिडवले होते. टॉसच्यावेळी ही गोष्ट घडली त्यामुळे आता सामन्यात काय होणार, याची उत्सुकता सर्वांना लागलेली होती. टॉसनंतर हार्दिक बोलत असताना चाहत्यांनी त्याची खिल्ली उडवली होती आणि त्याची बोलतीच बंद केली होती. त्यामुळे हार्दिकला मुंबईचे प्रेक्षक चिडवणार, असे स्पष्ट दिसत होते. पण त्यावेळी रोहित शर्मा हा हार्दिकच्या मदतीला धावून आल्याचे पाहायला मिळाले.

मुंबईचा संघ जेव्हा गोलंदाजी करत होता, तेव्हा चाहते हार्दिकला चिडवत असल्याचे पाहायला मिळत होते. वानखेडे हे मुंबईचे घरचे मैदान आहे, त्यामुळे मैदानात असे होऊ नये, असे प्रत्येक मुंबईच्या खेळाडूला वाटत होते. पण यासाठी पुढे आला तो रोहित शर्मा. रोहित हा क्षेत्ररक्षण करत असताना सीमारेषेजवळ उभा होता. त्यावेळी चाहते हे हार्दिक पंड्याला चिडवत होते. त्यावेळी रोहित शर्माने चाहत्यांना विनंती केली की, हार्दिकला चिडवणे तुम्ही थांबवा. हे सांगत असताना रोहितने हात जोडल्याचेही पाहायला मिळाले. कारण हार्दिकला चिडवत असताना कुठेतरी मुंबई इंडियन्सच्या संघाचीही बदनामी होत असते. त्याचबरोबर हार्दिक हा मुंबई इंडियन्सचा कर्णधार आहे, त्यामुळे आपल्या कर्णधाराबाबत रोहितने केलेल्या या कृत्यामुळे सर्वांची मनं जिंकली आहेत. रोहित जर खरंच हार्दिकचा विरोधक असला असता तर त्याने असे कृत्य केले नसते. त्यामुळे रोहितने एक एक कृत्य करत संघभावना दाखवून दिली आहे.

रोहित शर्माचा हा व्हिडिओ सध्याच्या घडीला चांगलाच व्हायरल झाला आहे. रोहित या व्हिडिओमध्ये चाहत्यांना हार्दिकला चिडवू नका, असे सांगत आहे. त्यामुळे रोहितच्या मनात तरी हार्दिकबाबत काहीही वाईट नसल्याचे या व्हिडिओमधून स्पष्ट झाले आहे. हार्दिकने रोहितचा पहिल्या सामन्यात अपमान केला होता. रोहितला त्याने फिल्डींगसाठी दूरवर पाठवले होते. त्यामुळे रोहित आता हार्दिकचा बदला घेणार असे, असे म्हटले जात होते. पण रोहितने कोणतीही वाईट गोष्ट मैदानात केली नाही, उलट त्याने हार्दिकला मदत केल्याचेच समोर आले आहे.

रोहित शर्मा हा एक खेळाडू म्हणून नेमका कसा आहे, हे या व्हिडिओमधून पुन्हा एकदा सर्वांना पाहायला मिळाला आहे. त्यामुळे रोहितचा चाहत्यांच्या मनातील सन्मान अजून वाढला आहे.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-02T08:45:25Z dg43tfdfdgfd