‘डेरवण युथ गेम्स’ राज्यस्तरीय क्रीडा महोत्सव २१ मार्चपासून, कोकणात रंगणार विविध खेळांचा थरार

मुंबई : शिवजयंती सोहळ्यानिमित्त श्री विठ्ठलराव जोशी चॅरिटीज ट्रस्टतर्फे (एसव्हीजेसीटी) ‘डेरवण युथ गेम्स’ (डीवायजी) या राज्यस्तरीय क्रीडा महोत्सवाचे आयोजन २१ ते २८ मार्चदरम्यान करण्यात आले आहे. कोकणातील चिपळूणनजिकच्या डेरवण येथे होणाऱ्या या महोत्सवात अॅथलेटिक्स, जिम्नॅस्टिक, बॅडमिंटन, टेबलटेनिस, जलतरण, तिरंदाजी, नेमबाजी, बुद्धिबळ, कॅरम, कबड्डी, खो खो, लंगडी, मल्लखांब, योग या वैयक्तिक खेळांसह फुटबॉल, व्हॉलीबॉल, बास्केटबॉल या सांघिक खेळांचा समावेश आहे. तसेच वॉल क्लायम्बिंगचाही समावेश यामध्ये असेल.

डेरवण युथ गेम्सचे यंदा दहावे वर्ष आहे. दरवर्षी राज्यभरातील खेळाडूंचे या स्पर्धेकडे लक्ष लागलेले असते. भारतीय खेळ आणि ऑलिम्पिक खेळांचा संगम असणाऱ्या या स्पर्धेसाठी खेळाडूंची नावनोंदणी सुरू झाली आहे. या निमित्ताने डेरवण येथील क्रीडा संकुलातही महोत्सवासाठी जय्यत तयारी सुरू आहे. स्पर्धेचे उद्घाटन गुरुवार, २१ मार्च रोजी रोइंगमधील ध्यानचंद पुरस्कारप्राप्त ज्येष्ठ खेळाडू स्मिता शिरोळे यादव यांच्या प्रमुख उपस्थितीमध्ये होईल. आठ दिवस चालणाऱ्या या स्पर्धेत राज्यभरातील आठ हजारांहून अधिक खेळाडू यामध्ये सहभागी होतील असा अंदाज आहे.

स्पर्धेतील विजेत्यांना पदके, चषक आणि रोख पारितोषिके देऊन गौरविण्यात येणार आहे. स्पर्धेच्या अनुषंगाने क्रीडा मानसतज्ज्ञ, आहारतज्ज्ञ तसेच प्रशिक्षक, राष्ट्रीय खेळाडूंचा परिसंवाद व मुलाखतींचा कार्यक्रमही आयोजित केला जाणार आहे. या स्पर्धेत ८ ते १८ या वयोगटातील खेळाडूंना सहभागी होता येईल. नावनोंदणी २० मार्चपर्यंत सुरू असेल. ऑनलाइन नोंदणी www.svjctsportsacademy.com या वेबसाइटवर सुरू असून, नोंदणीसाठी आणि अधिक माहितीसाठी ९८२२६३९३०६ / ८८०५२२८९२२ मोबाइल क्रमांकावर संपर्क साधता येईल.

या स्पर्धेत खेळाडूंना एकूण १,०५० पदके, १११ करंडक बक्षीसरूपात देण्यात येणार आहे. अनेक राष्ट्रीय खेळाडूंनी या स्पर्धेत आपला सहभाग निश्चित केला आहे. विविध क्रीडा प्रकारांत राज्यातील खेळाडूंचा चित्तथरारक खेळ या स्पर्धेनिमित्त पाहण्याची पर्वणी प्रेक्षकांना, क्रीडाप्रेमींना मिळणार आहे.

स्पर्धेचा समारोप आणि पारितोषिक वितरण समारंभ शिवजयंतीच्या दिवशी, म्हणजे २८ मार्च रोजी महाराष्ट्र जिम्नॅस्टिक असोसिएशनचे अध्यक्ष संजय शेट्ये यांच्या विशेष उपस्थितीमध्ये पार पडणार आहे.

2024-03-04T13:18:21Z dg43tfdfdgfd