मुंबई इंडियन्स आता प्लेऑफ विसरा, दिल्ली कॅपिटल्सकडून झाला पराभव; MIचा हंगामातील पराभवाचा षटकार

नवी दिल्ली: दिल्ली कॅपिटल्सने दिलेल्या २५८ धावांच्या लक्ष्याचा पाठलाग करताना मुंबई इंडियन्सला २० षटकात २४७ धावा करता आल्या आणि त्यांचा १० धावांनी पराभव झाला. खराब गोलंदाजी आणि त्यानंतर खराब फलंदाजींमुळे मुंबई इंडियन्सचा आणखी एका सामन्यात पराभव झाला. हार्दिक पंड्याच्या नेतृत्वाखाली मुंबईचा हा ९ सामन्यातील सहावा पराभव ठरला. आजच्या पराभवानंतर मुंबई इंडियन्स गुणतक्त्यात ८व्या स्थानावरून नवव्या स्थानावर घसरले आहेत. मुंबईच्या अजून ५ लढती शिल्लक असून त्या सर्व मॅचमध्ये विजय मिळवला तरी ते प्लेऑफमध्ये पोहोचू शकतील याची हमी देता येणार नाही.

विजयासाठी २५८ धावांचे मोठे लक्ष्य घेऊन मैदानात उतरलेल्या मुंबईची सुरुवात अतिशय खराब झाली. संघाचे दोन्ही सलामीवीर ५० धावसंख्येच्या आता माघारी परतले. रोहित शर्मा ८ चेंडूत ८ तर ईशान किशन १४ चेंडूत २० धावा करून माघारी परतले. त्यानंतर सूर्यकुमार यादव देखील फार चमकदार कामगिरी करू शकला नाही. तो १३ चेंडूत २६ धावाकरून माघारी परतला. त्यानंतर तिलक वर्मा आणि हार्दिक पंड्या यांनी चौथ्या विकेटसाठी अर्धशतकी भागिदारी केली खरी पण ही जोडी संघाला फार पुढे घेऊन जाऊ शकली नाही. कर्णधार हार्दिकने २४ चेंडूत ४६ धावा केल्या. त्यानंतर आलेला नेहल वढेरा फक्त ४ धावांवर बाद झाला.

मुंबईने १४० धावांवर ५ विकेट गमावल्या होत्या. अशात वर्मा आणि टिम डेव्हिड यांनी ७० धावांची भागिदारी करून संघाचे आव्हान जिवंत ठेवले होते. पण १८व्या षटकात डेव्हिड १७ चेंडूत ३७ धावांवर बाद झाला. आणि मुंबईच्या विजयाच्या आशेला मोठा धक्का बसला. मुंबईकडून तिलक वर्मा अखेर पर्यंत लढला. त्याने ३२ चेंडूत ६३ धावा केल्या.

त्याआधी दिल्लीने दमदार फलंदाजीच्या जोरावर २५७ धावा उभ्या केल्या. दिल्लीकडून जेक फ्रेझर-मॅकगर्कने फक्त २७ चेंडूत ८४ धावा कुटल्या. अन्य फलंदाजांमध्ये अभिषेकने २७ चेंडूत ३६, शाई होपने १७ चेंडूत ४१, पंतने १९ चेंडूत २९, ट्रिस्टन स्टब्सने २५ चेंडूत ४८ धावांचे योगदान दिले. या लढतीत मुंबईच्या सर्व गोलंदाजांची धुलाई झाली. वुड, बुमराह, चावला आणि नबी यांनी प्रत्येकी एक विकेट घेतल्या.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-27T14:31:53Z dg43tfdfdgfd