रोहित शर्माने कमावलेला नावलौकिक हार्दिकने एका झटक्यात धुळीस मिळवला,हैदारबादने MIच्या गोलंदाजांची पिसं काढली

हैदराबाद: आयपीएलच्या इतिहासातील सर्वात यशस्वी संघ, तब्बल ५ विजेतेपदे, सर्वोत्तम गोलंदाजीसाठी ओळखळा जाणारा संघ अशी मुंबई इंडियन्स ओळख. मुंबईच्या गोलंदाजांचा समाचार घेण्याची हिम्मत अगदी चेन्नई सुपर किंग्ज सारख्या संघाला कधी जमली नाही. ज्यांच्या गोलंदाजांची धाक सामना सुरू होण्याआधी प्रतिस्पर्धी संघाच्या फलंदाजांवर असते. अशा संघाविरुद्ध आयपीएलच्या इतिहासातील सर्वोच्च धावसंख्या उभारली जाऊ शकते यावर मुंबईच काय तर अन्य १० संघाच्या चाहत्यांचा विश्वास बसणार नाही. पण ही अशक्य अशी कामगिरी सनरायझर्स हैदराबाद संघाने बुधवारी आयपीएल २०२४च्या ८व्या लढतीत करून दाखवली.

प्रथम फलंदाजी करणाऱ्या हैदराबादने आयपीएलच्या इतिहासातील सर्वोच्च धावसंख्या उभी केली. मुंबईच्या गोलंदाजांची पिसे काढत हैदराबादने ३ बाद २७७ धावा उभ्या केल्या. या खेळीत अनेक विक्रम देखील झाले. रोहित शर्माने गेल्या काही वर्षात मुंबईला जो मान आणि लौकिक मिळून दिला होता तो या सामन्यात हार्दिक पंड्याच्या नेतृत्वाखाली धुळीस मिळाला.

१) हैदराबादच्या फलंदाजांनी मुंबईविरुद्ध तब्बल १८ षटकार मारले. स्पर्धेच्या इतिहासात षटकारांच्या बाबत ते तिसऱ्या स्थानावर आहे. अव्वल स्थानी आरसीबी असून त्यांनी २०१३ साली पुणेविरुद्ध २१ षटकार मारले होते.

२) आयपीएलच्या इतिहासातील कोणत्याही संघाने केलेली ही सर्वोच्च धावसंख्या आहे. त्यांनी बेंगळुरूने २०१३ साली केलेल्या २६३ धावांचा विक्रम मागे टाकला.

३) आफ्रिकेचा युवा गोलंदाज क्वेना मफाकाने ४ षटकात ६६ धावा दिल्या. स्पर्धेच्या इतिहासातील तो संयुक्तीपणे तिसऱ्या क्रमांकाचा महाग गोलंदाज ठरला.

४) हैदारबादच्या डावात चार जोड्यांनी ४५ हून अधिक धावांची भागिदारी केली. स्पर्धेच्या इतिहासात असे चौथ्यांदा झाले आहे.

५) क्लासेन आणि मार्कराम यांनी चौथ्या विकेटसाठी नाबाद ११६ धावांची भागिदारी केली. हैदारबाद संघाकडून झालेली ही सर्वोच्च भागिदारी ठरली.

६) पुरुषांच्या टी-२० क्रिकेटमध्ये हैदराबादने केलेल्या २७७ धावा या चौथ्या क्रमांकाच्या सर्वोच्च धावा ठरल्या. या यादीत नेपाळचा संघ अव्वल स्थानी असून त्यांनी २०२३ मध्ये मंगोलियाविरुद्ध ३१४ धावा केल्या होत्या.

७) या लढतीत हैदारबादने २७७ तर मुंबईने २४६ धावा केल्या. दोन्ही संघांनी मिळून ५२३ धावसंख्या उभी केली.

८) पुरुषाच्या टी-२० मधील ही सर्वोच्च धावसंख्या आहे. याआधी आफ्रिके आणि वेस्ट इंडिज यांच्यातील लढतीत ५१७ धावा झाल्या होत्या. तर आयपीएलमध्ये चेन्नई आणि राजस्थान यांच्यातील २०१० मधील लढतीत ४६९ धावा झाल्या होत्या.

९) दोन्ही संघांनी मिळून या लढतीत ३८ षटकार मारले. यात हैदराबादने १८ तर मुंबईने २० षटकार मारले. आयपीएलच्या इतिहासात एका सामन्यात मारण्यात आलेले हे सर्वाधिक षटकार आहेत. इतक नाही तर पुरुषांच्या टी-२० क्रिकेटमध्ये देखील हा विक्रम ठरला आहे.

१०) चौकारांचा विचार करता या लढतीत ६९ चौकार मारले गेले. आयपीएलच्या इतिहासातील ही तिसऱ्या क्रमांकाची कामगिरी ठरली.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-03-27T18:02:17Z dg43tfdfdgfd